E Méindeg de Moie war de Vizepremier a Verdeedegungsminister eisen Invité vun der Redaktioun.

D'Konflikt-Linn wier bei dësem Virfall iwwerschratt ginn. D'ëffentlech Sécherheet géing an d'Hänn vu Policebeamte gehéieren. Sou kommentéiert de grénge Minister François Bausch de Video an deem en Hond vun enger privater Sécherheetsfirma eng Persoun an d'Bee bäisst. Fir de Rescht misst een d'Enquête ofwaarden. Et sollt elo keen dat Ganzt aus der Hëft eraus kommentéieren an et sollt mat deem Sujet keng Politik gemaach ginn, sou de François Bausch, deen e Méindeg de Moien eisen Invité vun der Redaktioun war.

D'lescht Woch war europäesche Verdeedegungs-Conseil. No den Evenementer an Afghanistan sollen d'europäesch Arméien elo Kräfte bündelen an zum Beispill zesumme Material kafen, sou den Défense-Minister Bausch. Et sollt keng europäesch Arméi kommen, mä eng gemeinsam Trupp. Natierlech bräicht een do eng europäesch Kommando-Struktur mat den néidege Pouvoiren.

Wat de gemeinsame Batailloun mat  der Belsch ugeet, do misste lo mol eng Rei Etüde gemaach gi fir ze kucken, wéi déi praktesch Organisatioun kéint ausgesinn. Dëse Batailloun kéint fréistens 2027, 2028 operationell sinn. Hei géingen zwee Länner virmaachen, wéi eng Kooperatioun op europäeschem Niveau kéint ausgesinn.

An de Flüchtlingsfro gëtt de François Bausch dem Ausseminister Jean Asselborn an der Saach Recht, wat déi verbal Attacken a Richtung Éisträich an aner Länner ugeet. Et wier dramatesch, wéi onsolidaresch d'Europäesch Unioun an dëser Saach wier, sou de François Bausch.

Mat Bléck op de Corona-Hierscht mécht et dem François Bausch Suergen, datt d'Impfquot zu Lëtzebuerg net héich genuch ass. Mir missten op 80% kommen. An anere Länner wier dat de Fall. Eng gréisser Campagne fir ze mobiliséiere géing elo am September gemaach ginn.

Invité vun der Redaktioun: François Bausch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.