E Méindeg de Moie war den LSAP-Vizepremier an Aarbechtsminister eisen Invité vun der Redaktioun.

Den Dan Kersch wëll net LSAP-Spëtzekandidat bei de Chamberwalen 2023 ginn an hie wëll och kee Posten an enger nächster Regierung. Den LSAP-Vizepremier an Aarbechtsminister huet dat selwer e Méindeg de Moien hei op RTL matgedeelt.

Hie sot hien hätt dat an de leschten Deeg perséinlech decidéiert, well hien am Dezember 60 Joer kritt, mä och an der Hoffnung, datt net méi spekuléiert gëtt, hie wéilt nach bei den nächste Walen „seng lescht Chance probéieren“.

Säi parteipolitescht Zil wier trotzdeem, datt d’LSAP déi nächst Wale gewënnt. A vläicht fir d’éischte Kéier an der Geschicht de Premierminister stellt oder d’Premierministesch: „Dir wësst datt ech e grousse Fan vum Paulette Lenert sinn“.

Mécht den Dan Kersch säi Mandat als Minister bis 2023 fäerdeg? A geet en nach mat an d’Wale fir Deputéierten ze ginn? Dat wiere Froen, déi mat der Partei missten diskutéiert ginn. „Wat am Moment usteet, ass net Spekulatiounen driwwer wat ech an engem oder zwee Joer maachen, mä wat am Moment usteet, ass déi Aarbecht fäerdegzemaachen, déi am Regierungsprogramm steet“, sou den LSAP Vize-Premier.

Wat net am Regierungsprogramm steet, dat ass d’Coronakris, déi nach net fäerdeg ass an awer och d’Coronasteier. Den Dan Kersch schwätzt sech jo zanter Méint dofir aus, datt Betriber, déi d’lescht Joer 10% méi Benefice gemaach hätten ewéi an der Period 2015 bis 2019, en extra Bäitrag vun 10% zum Beispill misste bezuelen.

De Piraten-Deputéierte Sven Clement huet kritiséiert, de Staat géing mat esou eng Steier just eng 27 Milliounen Euro akasséieren. Den Dan Kersch sot, dat géing ganz dovunner ofhänken „wéi een et mécht“. Senger Aschätzung no kéint eng Coronasteier och tëscht 100 an 120 Milliounen Euro Recettë generéieren. Op déi aner Kritik, oder Fro: firwat soll een e Betrib besteieren, dee gutt geschafft huet oder e Benefice gemaach huet, well en zum Beispill säi Gebai verkaaft huet, huet den Dan Kersch geäntwert, et géing drëm goen déi ze treffen, déi vun der Kris profitéiert hunn.

Soll een net, éischter wéi nei Steieren, Steierdeduktiounen oder Bonifikatiounen ofbauen? Op déi Fro huet den Dan Kersch geäntwert, et wier an deem Beräich an deene leschte 7 Joer méi geschitt ewéi déi 30 Joer virdrun. Mä et wier een nach laang net um Enn.

Invité vun der Redaktioun: Dan Kersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.