En Donneschdeg de Moie war de President vun der Autosfederatioun eisen Invité vun der Redaktioun.

Weltwäit gëtt et Probleemer bei der Produktioun vu Mikroprozesseren. Dat ass de Grond, firwat och zu Lëtzebuerg nei Autoen net erbäikommen. Vill Leit waarden zënter Méint op hiert Gefier a leider hätten d'Garagisten net ëmmer Äntwerten op d'Froe vun de Clienten. Dat sot de Philippe Mersch, President vun der Autosfederatioun Fedamo en Donneschdeg de Moien am RTL-Interview.

All déi Concernéiert solle mat hirem Garage Récksprooch huelen an no Léisunge sichen. Normalerweis gëtt „just in time" produzéiert a wann et do Fluktuatioune gëtt, da kënnt et zu Problemer. Et géif just e puer Fabricken op der Welt ginn, déi sou Chippe produzéieren.

Vläicht géif et d'nächst Joer am Summer besser goen, hofft de Philippe Mersch. Hien ass frou, datt d'Clienten am Moment awer weider an d'Garagë komme fir ze kafen.

Zu Lëtzebuerg hätt dës ganz Liwwerprobleematik awer derfir gesuergt, datt bis Enn September just 35.000 Autoen ugemellt goufen, 20% manner wéi 2019.

D'Constructeuren hätten den Ament iwwregens d'Tendenz, fir Elektrogefierer bei der Produktioun ze privilegiéieren, wéinst dem CO2-Bilan.

Apropos Elektro: Bei 18,7% vun den Immatrikulatiounen dëst Joer handelt et sech ëm elektresch Gefierer oder Hybridautoen. Den Trend no uewe géing sech confirméieren, sou de Vetrieder aus der Autosbranche. De Philippe Mersch verlaangt iwwerdeems eng staatlech Ënnerstëtzung bei der Installatioun vun Elektro-Bornen. Et kéint net sinn, datt privat Entreprisë kee Cent kréien, wa se Elektro-Infrastrukture schafen.

Invité vun der Redaktioun: Philippe Mersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.