E Méindeg de Moie war den CSV- Europadeputéierte Christophe Hansen eisen Invité vun der Redaktioun.

Et ass e ganz gudde Kompromëss. Et geet de Baueren ze wäit an den Ëmweltorganisatiounen net wäit genuch, dat wär e gutt Zeechen, sot den CSV-Europadeputéierte Christophe Hansen e Méindeg de Moien, ee vun de Rapporter vun der Reform vun der gemeinsamer EU-Agrarpolitik. Hie war eisen Invité vun der Redaktioun, een Dag, éier am Europaparlament den definitive Vott ass.

D'Reform vun der EU-Agrarpolitik hätt leider elo scho Retard. Et wier laang an haart verhandelt ginn.

De Budget geet net an d’Luucht, d’Erausfuerderunge fir d’Baueren awer schonn. En Deel vun de Suen ass an Zukunft un Öko-Reegelunge gekoppelt. Dat geet den Ëmweltorganisatiounen net wäit genuch. Méi Klimaschutz wier awer schwiereg, dat géif deier ginn, a wat wären d’Alternativen?

Den Drock op d'Bauere wier scho grouss. Elo misst ee kucken, wat nach machbar ass, seet den Europadeputéierten.

Speziell déi jonk Baueren, déi d'Zukunft vum Secteur wieren, misste gehollef kréien. D’Reform soll kleng a Familljebetriber och méi ënnerstëtzen.

Déi gemeinsam Agrarpolitik ass scho laang ëmstridden: vill Fläch, vill Suen an ze wéineg Ëmweltschutz. D’Suen, déi verdeelt ginn, sinn enorm. Bal 60 Milliarden all Joer.

D’Fro un de Christophe Hansen, ob hien als Rapporter och vill Lobbyaarbecht ze spiere krut. Um Internetsite misst een uginn, wien ee getraff huet. Dat ware Baueren- an Ëmweltverbänn. D’Industrieverbänn, déi fir Planzeschutzmëttel gelobbyt hätten, hätt hien net gehat. Dat wär och keng Sippschaft, déi hien onbedéngt wéilt a sengem Büro hunn, sou den CSV-Politiker.

De Christophe Hansen ass och CSV-Generalsekretär. Am Politmonitor huet hien, mä och aner CSV-Membere verluer.

Iwwer sou e Resultat wär een natierlech net frou. Als Gemengepolitiker am Norden an Europadeputéierte wär een och manner an der Press. D’Resultater hätten hien awer och net iwwerrascht. D’CSV hätt e puer schwéier Méint hannert sech an och nach viru sech. Déi, déi Verantwortung iwwerholl hunn, hätte Plomme gelooss.

Hie wënscht sech keng weider Schlammschluecht. Vum CSV-Generalsekretär ass et den Appell, sech a Richtung Zukunft z’orientéieren.

Invité vun der Redaktioun: Christophe Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.