E Freideg de Moie war den Administrateur-délégué vun der ACA eisen Invité vun der Redaktioun.

Iwwer 90% vun den Dossiere vu Schied duerch d'Héichwaasserkatastroph am Juli, konnten antëscht ofgeschloss ginn.  Datt dat deels gedauert huet, wier op Fléckaarbechten zeréckzeféieren, déi net direkt ze maache waren.
Dat sot de Marc Hengen vun der Assurancen-Associatioun ACA e Freideg de Mueren am RTL-Interview.

Mat 125 Milliounen Euro ass et deen héchste Schued, dee jee fir de Lëtzebuerger Assurancë-Secteur entstanen ass.

Assurancë kéinte méi deier ginn

D'Katastroph huet d'Assurancen 10 mol méi kascht, wéi dat wat se fir de versécherte Risk erakruten. Duerch de Prinzip vun de Réassurancë misste Compagnië sech awer keng finanziell Suerge maachen. D'Réassurance hätt allerdéngs e Präis. An dee géif natierlech vum Schuedensverlaf ofhänken. A well Assurancë misste rentabel funktionéieren, kéint et sinn, datt d'Käschten och fir de Client erop ginn, well déi eenzel Assurancë méi deier ginn.

Dat misst awer all Assurancëgesellschaft fir sech decidéieren, esou den Administrateur-délégué vun der ACA.

Demande no Héichwaasser-Assurance geklommen

Nom Héichwaasser, ass d'Demande no de fräiwëllegen Assurancë géint Héichwaasser eropgaangen. Och an Net-Iwwerschwemmungsgebidder. Déi kann een zanter 2017 ofschléissen. De Besoin dës Zort Assurance obligatoresch ze maachen, gesäit de Marc Hengen net.

2021 war fir de Lëtzebuerger Assurancë-Secteur e Joer vun der Reprise. Covid hätt zejoert zu Aschnëtter haaptsächlech bei de Liewensversécherunge gefouert a besonnesch dat internationaalt Geschäft hätt gelidden.

Reprise an nei Risiken

Et kéim een nees op den Niveau vun 2019, also virun der Pandemie. De Secteur géif och antizipéieren, analyséiere wou nei Risike sinn. Nei Domainer wieren zum Beispill nieft de Wiederextremer, d'Cyber-Sécherheet.

Stéchwuert Digitaliséierung: Dat wier besonnesch och elo an der Pandemie e Phenomeen ginn. Ouni digital Outile wier et sécher vill méi schwiereg ginn, fir d'Geschäft weiderzeféieren, wann ee sech net ka gesinn. D'ACA huet als Daachverband am aktuelle Kontext hire Memberen iwwregens un d'Häerz geluecht sech impfen ze loossen. Och aus Solidaritéit. Dat wier och vun de Leit gutt ugeholl ginn.

Reglementareschen Tsunami

E Problem an den Ae vun der ACA wier den Ament d'Iwwerreeglementatioun, esou nach de Marc Hengen.  Et hätt een d'Gefill, datt nëmmen eent bei d'anert gesat gëtt. Den Direktiounsbeoptraagte vun der ACA huet d'Beispill vun engem Kontrakt fir eng Liewensversécherung genannt. 185 Informatiounspunkten duerch déi ee goe misst, ier een iwwerhaapt bei dat Wesentlecht kéim. Hei misst ee sech d'Fro stellen, ob dat nach sënnvoll ass.

Invité vun der Redaktioun: Marc Hengen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.