En Donneschdeg de Moie war d'RTL-Journalistin eis Invitée vun der Redaktioun.

D’Sécherheetsproblematik am Garer Quartier ass en Thema, dat emotional opgelueden ass. Dowéinst hu mir eis fir eise Moiesinterview bewosst géint e Vertrieder vu Politik, Police oder den Awunner entscheet. Eis Journalistin Annick Goerens war e Mëttwoch op der Biergerversammlung an huet seng perséinlech Impressioune gedeelt.

Wéi am Sall d’Fro gestallt gouf, wien dofir ass, nees eng Sécherheetsfirma ze engagéieren, sinn zwar eng ganz Partie Hänn an d’Luucht gaangen, mä bei wäitem net all. D’Awunner vum Garer Quartier wieren éischter fir méi Policepresenz, krut d’Annick Goerens gesot.

Wat d’Representatioun vun de Leit ugeet, wier eng bont Mëschung bei der Reunioun gewiescht, nodeems am Ufank éischter méi eeler Leit koumen. De Statistike vun der Gemeng Lëtzebuerg no wunnen eng 11.100 Leit op der Gare, d’Alterspyramid weist, dass hei eng relativ jonk Populatioun lieft.

RTL

Etat de la population 2020, p. 30 (Statistiques sur la Ville de Luxembourg)

Donieft ass de Garer Quartier, deen eenzegen an deem d'Leit mat der Lëtzebuergescher Nationalitéit net déi gréisste Grupp ausmaachen. Op éischter Plaz sti Leit mat der Franséischer Nationalitéit, da kënnt déi Portugisesch a ganz knapp dohannert déi Lëtzebuergesch.

Etat de la population 2020, p. 29 (Statistiques sur la Ville de Luxembourg)

Op sech dëst Bild och op der Reunioun erëmspigelt, konnt d’Annick Goerens net sou direkt soen. Eng Partie Leit hätten awer gesot, dass si och bei de viregten Reuniounen dobäi gewiescht wieren an di d’Gefill hätten, dass sech net wierklech eppes ännert. Et bleift also beim Argument, dass ee sech géing vergiess fillen. Et gouf och d’Beispill genannt, dass et fréier Kinoen am Garer Quartier gouf, dowéinst wier et och d’Propos, dass méi Offer sollt geschafe ginn, fir dass och effektiv och Owes d’Leit méi erausginn an de Quartier net der Kriminalitéit iwwerlooss gëtt.

Invité vun der Redaktioun: Annick Goerens

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.