En Dënschdeg de Moie war d'Stater Buergermeeschtesch eis Invitée vun der Redaktioun.

Déi grouss Mass u Leit, déi op eemol op der Place d‘Armes waren, an déi Gewalt-breetschaft bei der Maniff géint d‘Coronamesuren hu mir an de Leit an der Stad Angscht gemaach. Dat sot d'Stater Buergermeeschtesch Lydie Polfer en Dënschdeg de Moien als eis Invitée vun der Redaktioun.

D'Gemeng hätt näischt vun der Maniff gewosst a wär deemno iwwerrascht ginn. Den Dag selwer hätt awer kee vun der Police sech bei hir gemellt, fir Bescheed ze soen, wat géing geschéien. Si wär an der Stad gewiescht an hätt de ganzen Trubel an de Kaméidi héieren, a sech du proaktiv bei der Police gemellt, fir de Foraine Bescheed ze soen, dass se sollen hir Buden um Chrëschtmaart zoumaachen.

Si hätt net gesinn, wéi vill Beamten um Terrain waren an op dat duergaange wär, mä d'Police hätt sech awer gutt verhalen, well si keng Provokatioun gemaach, an op Deseskalatioun gesat hätt. E Fonke wär nämlech duergaangen, fir do eng gréisser Ausernanersetzung ze verursaachen, sou d‘Invitée.

Zu Bouneweg, beim Haus vum Premier, hätt d'Police net am Viséier gehat, mä do hätt anescht misse reagéiert ginn. Seng Meenung fräi ausdrécken, géif net heeschen, anere Leit hier Liewensgrondlag ewech ze huelen. Notamment den Händler um Chrëschtmaart an de Stater Geschäftsleit, sou d'Lydie Polfer.

Wéi kënnen déi nächst Maniffen encadréiert ginn?

D'Police hätt de Monopol vun der Gewalt am Staat a wier deementspriechend gefuerdert, fir déi nächst Maniffe besser z'encadréieren. Op enger Reunioun tëscht der Gemeng, der Policedirektioun, dem Policeminister an dem Parquet wär festgehale ginn, dass déi nächst Demonstratioune mussen ugemellt, a vun der Police encadréiert ginn. A wann d'Leit sech dann net un de festgehalenen Trajet halen, da misst d‘Police intervenéieren an dat wiere ganz schwiereg a ganz sensibel Momenter.

Et misst een och verhënneren, dass d'Manifestanten an den Zentrum vun der Stad kommen, esou d‘Buergermeeschtesch. Um Dënschdeg wier nach eng Reunioun vun der Buergermeeschtesch, dem Premierminister an dem Parquet, fir doriwwer ze diskutéieren. D'Stad Lëtzebuerg kéint zwar keng Demonstratioune verbidden, ma d'Lydie Polfer huet awer en Appell un déi verstänneg Leit gemaach, net bei der Manifestatioun matzegoen.

Et wier um Policeminister d‘Decisioun ze huelen, fir Identitéitskontrollen vun de Manifestanten ze maachen, an esou wäit si wéisst, wier hien och gewëllt, dat ze maachen, sou d‘Lydie Polfer. Dann hätt een och eng besser Kontroll vun de Leit, déi an d'Land erakommen an hei Maniffen ënnerwanderen. Dat misst ee versiche vu vir era besser ze kontrolléieren, esou d'Buergermeeschtesch vun der Stad Lëtzebuerg.

Invité vun der Redaktioun: Lydie Polfer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.