En Donneschdeg de Moie war de President vun der Spidolsfederatioun eisen Invité vun der Redaktioun.

Invité vun der Redaktioun: Dr Philippe Turk

An de Spideeler gëllt zanter e Mëttwoch d’Phas 3, dat heescht, net-urgent Agrëffer kënne verréckelt ginn. Déi Phas wär eng logesch Konsequenz vun der Beleeung vun de Better. Zanter enger Woch hätt sech dat ugedeit, sot en Donneschdeg de Moien den Dr. Philippe Turk. De President vun der Spidolsfederatioun war eisen Invité vun der Redaktioun.

Invité vun der Redaktioun: Dr. Philippe Turk
Den Invité vun der Redaktioun vu méindes bis freides moies géint 8h10 am Studio vun RTL Radio Lëtzebuerg.

D’Kritik vun der AMMD, datt d’Dokteren iwwer d’Press doriwwer informéiert goufen, kann den Dr. Turk net wierklech novollzéien. D'Dokteren an de Spideeler wéisste genee, wou se dru sinn, an déi bësse chronesch-polemesch Kommunikatioun wier den Ament net ganz hëllefräich. Wat gebraucht géing ginn, wär eng Dokterschaft, déi kollaboréiert an engagéiert ass, an déi hätt een och an de Spideeler, esou den Invité.

Kollateralschied duerch d'Phas 3?

Aktuell wären 23-24 Patienten op der Intensivstatioun a 55 an de Soins normaux. D'Phas 3 wier justifiéiert, well de Workload vun den Ekippe sou grouss wier, dass déi aner Aktivitéiten net méi alleguer kënne garantéiert ginn. Leit, déi a Gefor sinn, an och aner wichteg Operatioune géingen natierlech nach gemaach ginn, och ambulant a méi liicht Chirurgie.

Et wier ganz schwéier, fir e präzise Monitoring ze maachen, wéi vill Kollateralschied entstinn, well Operatioune verréckelt ginn a Patiente sech onsécher spieren an dowéinst net an hir Consultatioune ginn. Wärend e puer Wochen an e puer Méint d‘lescht Joer wären natierlech eng ganz Rei deelweis preventiv Ënnersichungen net gemaach ginn, déi wären awer 2021 nogeholl ginn. Et wier pretentiéis, fir wëllen e Chiffer ze nennen.

E ganz staarken Ermiddungsphenomeen

No bal 2 Joer Pandemie wär ee ganz staarken Ermiddungsphenomeen festzestellen. Dat net just physesch, well d‘Aarbecht ënner schwéiere Konditioune ganz intensiv wier, mee och emotional, well natierlech méi Leit op den Intensivstatioune stierwen. An dofir wär all Ënnerstëtzung vun der Populatioun wëllkomm. Natierlech mécht d‘Omikron-Variant Suergen, ma virun allem awer gesinn d‘Spideeler den niddrege Impftaux als problematesch. De President vun der Spidolsfederatioun plädéiert natierlech fir eng Impfung, mä wéilt sech net an der Fro vun enger Impfflicht tranchéieren.

Fir d'AMMD géing de Philippe Turk "Polemik mat berechtegter Kritik verwiesselen". Well si dëst "esou net stoe loosse wëllen", hu si an engem Facebook-Post reagéiert.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.