En Dënschdeg de Moie war de grénge Co-President Meris Sehovic eisen Invité vun der Redaktioun.

De Kontrakt vun 2018 tëscht dem Ëmweltministère an dem Bedreiwer vun der Superdreckskëscht hat keng legal Basis, geet aus zwee juristeschen Avisen ervir, déi e Méindeg an der zoustänneger Chamberkommissioun presentéiert goufen. Dat ass net ganz richteg, sou de grénge Co-President Meris Sehovic um Dënschdeg de Moien hei op RTL.

2005 gouf e Gesetz gestëmmt iwwert d’Funktionement an d’Finanzéierung vun der Superdreckskëscht an zanterhier wieren all d’Regierungen, d’Chamber an de Staatsrot der Opfaassung gewiescht, datt dat duer geet. Elo wier et esou, datt d’ «Rechtsopfaassung» geännert hätt, wat een och bei der Finanzéierung vum RGTR Bus-Reseau festgestallt hätt. Dem Meris Sehovic no, misst d’Chamber elo iwwerpréiwen, ob e Finanzéierungsgesetz misst nogereecht ginn.

Dem Meris Sehovic seng Ausso en Dënschdeg de Moien hei op der Antenn, datt hien Abléck an déi zwee Avisen hat, huet fir Kritik vun der CSV gesuergt. D’Fraktiounscheffin Martine Hansen huet gefrot, ewéi et méiglech wier, datt een deen net Deputéierten ass Abléck krut, iwwerdeems d’Chamberkommissioun e Méindeg vun deene Grénge gesot krut, d’Avise sollen net public gemaach ginn.

Impfflicht: Solidaritéit géigeniwwer de Mannerjäregen

Weidere Sujet um Dënschdeg de Moien am Interview mam grénge Co-President war d’Impfflicht, iwwert déi d’nächst Woch an der Chamber soll debattéiert ginn. Déi Gréng hu sech schonn d’lescht Woch fir eng generell Impfflicht vun 18 Joer un ausgeschwat. De Meris Sehovic sot et wier eng nuancéiert Positioun no internen Diskussiounen, wou ofgeweit gi wier tëscht Grondrechter an den individuelle Fräiheeten op der enger Säit, an de kollektive Responsabilitéiten op der anerer Säit. Donieft wier et awer och eng Fro vun der Praktibilitéit, sou de Meris Sehovic. Firwat soll dann d’Impfflicht vun 18 Joer u gëllen an net vu 50 Joer un, esou wéi et an Italien virgesinn ass? De grénge Co-President huet erkläert, datt déi Jonk ënnert 18 Joer net déi wieren, déi riskéieren d’Spideeler ze belaaschten, mee gläichzäiteg si et wieren, déi di am meeschten ënnert de Covid-Restriktioune gelidden hätten. Dowéinst wier eng Impfflicht fir déi Volljäreg en Akt vu Solidaritéit géigeniwwer de Mannerjäregen.

Wat d’Fro ugeet vun de Strofe fir Leit, déi trotz Impfflicht kee Vaccin géingen acceptéieren, dozou sot de Meris Sehovic, datt déi Gréng dogéint sinn, datt d’Strofe solle penal sinn. Si plädéiere fir administrativ Strofen am Fall, wou ee Stéchdatumer net géing anhalen. De Meris Sehovic huet awer betount, datt d’Fro vun der Bestrofung net prioritär wier, well et géing drëm goen, déi Leit ze erreechen, déi sech aus diverse Grënn nach net impfe gelooss hunn.

Atomenergie ass weder nohalteg nach stabel

Mam Co-President vun déi Gréng goung dann och Rieds iwwert d’Taxonomie: déi europäesch Aklasséierung vun den Energien. Déi Gréng sinn ausser sech, well d’EU-Kommissioun proposéiert, datt Atomenergie als "stabel" Energiequellen an als nohalteg ugesi gëtt. "Mir Gréng si mat béiden Aschätzungen net d’Akkord", sou de Meris Sehovic. Hien huet op d’Versuergungsproblemer an d’Hausse vum Präis vun Uranium higewisen, deen op d’politesch Kris am Kasachstan zeréckzeféiere wier. Op d’Remark, datt d’EU nach net genuch erneierbar Energie produzéiert an dowéinst op aner Energien ugewisen ass, huet de Meris Sehovic geäntwert, datt iwwert déi lescht zéng Joer vill Progrès gemaach gi wier.

D’Fro wier, ob Frankräich europäesch Steiergelder soll kréien fir "Schrottreakteren" ewéi Cattenom weider ze bedreiwen oder net. An do géingen déi Gréng zesumme mat anere Länner ewéi Däitschland oder Éisträich kloer «Nee» soen, sou de Meris Sehovic.

Invité vun der Redaktioun: Meris Sehovic

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.