E Freideg de Moie war de Fuerscher a Mikrobiolog a Member vun der Covid-19-Taskforce eisen Invité vun der Redaktioun.

Den Expertegremium vun de 5 Dokteren a Professeren, deen am Optrag vun der Regierung e wëssenschaftlechen Avis iwwert de medezineschen Notzen vun enger Impfflicht géint Covid ausgeschafft huet, schwätzt sech den Ament net fir eng allgemeng mä éischter eng cibléiert Impfflicht aus, cibléiert op verschidde Secteuren an dem Alter no.

Dat hu souwuel den Dokter Vic Arendt en Donneschdeg am Kloertext an e Freideg de Moien de Professer Paul Wilmes vun der Uni Lëtzebuerg als eisen Invité vun der Redaktioun RTL géintiwwer duerchblécke gelooss. Un der Nott ass bis e Freideg de Moien nach gefeilt ginn. Si soll am Prinzip awer elo dëse Freideg schonn nom Regierungsrot public gemaach ginn.  E Mëttwoch ass jo och eng Consultatiounsdebatt an der Chamber iwwert de Sujet.

De Biomedezinner Paul Wilmes huet um Radio erkläert, datt eng allgemeng Impfflicht elo ze breet géif usetzen. Wann eng Impfflicht decidéiert géif, misst een op alle Fall weider proaktiv op d’Leit duergoen, fir sech impfen ze loossen.

Impfflicht kéim eréischt no Omikron zum Droen

Eng Impfflicht hätt sécher keen Impakt méi op déi aktuell Omikron-Well. Vill méi géif et drëms goen, sech haut  laangfristeg opzestellen ob dat, wat an den nächste Méint kënnt, fir datt een iergendwann aus de restriktive Mesuren auskënnt. Aus der Pandemie wiere mer op alle Fall elo nach net eraus. Et misst ee léieren mam Virus ze liewen. Eng Impfflicht kéint, eisem Invité vun der Redaktioun no, no an no dozou féieren, datt déi sanitär Restriktiounen opgehuewe kënne ginn.

Bis 3.000 Fäll den Dag

D’Covidtaskforce rechent fir Uganks Februar mat engem Peak vun 2.000 bis 3.000 Fäll den Dag. Dat sinn der manner wéi nach am Ufank gefaart. Ënnert anerem well bei eis am Verglach zu Dänemark oder Groussbritannien, wou d’Infektiounen sech all zweeten, drëtten Dag verduebelt hunn, d’Masken an déi aner sanitär Mesuren d’Iwwerdroung bremse géifen. D’Donkelziffer wär warscheinlech awer däitlech méi héich, well vill asymptomatesch Infektiounen net erfaasst ginn, esou de Professer Paul Wilmes.

Ouni Booster, nach méi Infektiounen

Virun deem Hannergrond wier et grad elo wichteg seng sozial Interaktiounen ze limitéieren. Da kéint een d’Infektiounsgeschehe bremsen. Wichteg wier et och sech «boosteren» ze loossen. Da géif een d’Kurv och weider erofdrécken. Hätte manner Leit hir drëtt Dosis haut, hätte mer nach méi Infektiounen.

D’Hospitalisatioune stagnéieren den Ament. Omikron schéngt manner krank ze maachen, mä mir wëssen nach net wéi en Impakt déi aktuell Virusvariant zu Lëtzebuerg an den nächste Woche wäert sinn. Donieft wier och nach net gewosst wéi vill Long-Covid Omikron provozéiert.

Invité vun der Redaktioun: Professer Paul Wilmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.