E Mëttwoch de Moien war de President vun der Lëtzebuerger Denkmalschutzfederatioun eisen Invité vun der Redaktioun.

Mam neien Denkmalschutzgesetz, dat lescht Woch an der Chamber gestëmmt gouf, géife wuel eng Rei Verbesserunge fir d‘Zukunft kommen, esou de President vun der Lëtzebuerger Denkmalschutzfederatioun Paul Ewen e Mëttwoch de Moien an der Emissioun "Invité vu der Redaktioun".

Invité vun der Redaktioun: Paul Ewen

Dat heescht awer net, datt all Problemer geléist wieren. De Paul Ewen ënnert anerem bedauert, datt déi entspriechend Reglementer fir d‘Ëmsetzung vum Gesetz net direkt matgestëmmt goufen. Doduerch géif ee riskéieren, datt sech och an Zukunft weider Problemer um Terrain stellen, wa Gebaier klasséiert solle ginn, well d'Situatioun net kloer gereegelt ass.

Den Invité vun der Redaktioun huet och bedauert, datt mam Akraafttriede vum Gesetz de wëssenschaftlechen nationalen Inventaire nach net prett ass an deem all erhalenswäert Gebaier, Gemeng fir Gemeng, erfaasst solle ginn. Deen Inventaire soll, dem Gesetz no, an 10 Joer fäerdeg sinn. Grad mol dräi bis véier Gemengen hunn deen Exercice bis elo gemaach an de Sécherheetsfilet, deen am Text fir d'Iwwergangsphas virgesinn ass, geet dem President vun der Lëtzebuerger Denkmalschutzfederatioun och net wäit genuch.

Willkür vun de Gemengen

Ausserdeem wier et weider problematesch, dass d‘Kompetenze vum Denkmalschutz op zwee Ministère mat komplett ënnerschiddlechen Denkweise verdeelt wieren - d'Kultur an den Interieur. An donieft de Staat an d'Gemengen. D‘Gemenge géifen de Schutz vum gebauten Iewen deels komplett ënnerschiddlech ëmsetzen, esou d‘Kritik vum Paul Ewen, ouni datt de Staat och mam neie Gesetz do agräife kéint.

Hei géif et kloer u Koherenz feelen. Déi eng wiere ganz beméit hire Patrimoine ze erhalen. Anerer géifen dat anescht gesinn an "Tabula rasa mat hirem Passé" maachen. De President vun der Lëtzebuerger Denkmalschutzfederatioun huet d'Beispill Wäiswampech genannt. Hei wier den Duerf komplett entstallt ginn. D'Uertschaft Beeler wier urbanistesch komplett entstallt ginn. Dobäi géif theoretesch all Gemeng wëssen, wéi eng Gebaier ze klasséiere wieren, a wéi eng net. Och aner Gemenge wéi Réimech, Esch a Stroossen hätten nëmme ganz wéineg "Constructions à conserver" zréckbehalen.

Denkmalschutz bremst Logement net

Erhale vu gebautem Ierwe géif och net der Entwécklung vum Territoire am Wee stoen, sou de Paul Ewen. De Prozentsaz vun deem, wat erhale misst ginn, wier relativ kleng. Denkmalschutz géif net de Logementsproblem befligelen. Richteg wier, datt d'Sensibilitéit fir den Denkmalschutz hei am Land par Rapport zum Ausland net immens  developpéiert wier. Dat wier awer näischt neits, sou de Paul Ewen. Trotz Gesetzer schonn an den 1930er Jore wiere bis haut  an der Masse kaum Gebaier zréckbehale gi fir en nationale Schutz.

Präventiv Approche och am gebauten Ierwen

Mam neien Denkmalschutz gëtt d'Méiglechkeet vun enger präventiver Archeologie agefouert. Der Lëtzebuerger Denkmalschutzfederatioun hätt een awer genee sou gutt kéinte präventiv beim gebauten Ierwe virgoen. E bessere System wier et dem Paul Ewen no gewiescht, e Moratoire fir déi ronn 27.000 Gebaier uechter d‘Land, déi als schützenswäert markéiert goufen, ze decidéieren an dës Protektioun da jee no Fall eenzel opzehiewen. De politeschen Drock hätt dat allerdéngs verhënnert.

Ästhetik spillt keng Roll

D'Ästhetik géif keng Roll spillen am Gesetz fir e Gebai ze klasséieren. Ob e Gebai schéin ass oder net, wier absolut kee Critère. Relevant wieren d'Kulturgeschicht vum Gebai, d'Sozialgeschicht an d'Authentizitéit. 15  Klassementscritèren am ganzen. Hei kéinten de Kulturministère an och hir Associatioun nach Sensibiliséierungsaarbecht leeschten.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.