E Méindeg de Moie war d'Gesondheetsministesch eis Invitée vun der Redaktioun.

D'Maternité vum Centre hospitalier du Nord muss virleefeg vun e Méindeg un zoumaachen. Hannergrond ass de Manktem u Kannerdokteren, déi d'Noutdéngschter kënnen assuréieren. Dat ass ee Problem, dee scho laang schleeft a sech elo an der Lescht eben därmoossen zougespëtzt huet, dass e reguläre Betrib net méi méiglech wier. Dem Spidolsgesetz no misst ee Pediater fir Noutfäll bannen enger kuerzer Zäit an der Klinik kënne sinn. Dat ass zu Ettelbréck awer net méiglech an dowéinst wëllen och d'Gynekologen an d'Anästhesisten net méi esou schaffen, dass se dem Gesetz no net konform sinn. D'Fraendoktere géifen hiert Bescht maachen, fir hir Patientinnen elo an eng Maternité an der Stad ze orientéieren.

De Problem ass effektiv dee vu spezialiséierten Dokteren am Land. Dat confirméiert d'Gesondheetsministesch Paulette Lenert de Méindeg de Moien, si war eis Invitée vun der Redaktioun. Et hätt ee leider nach keng Wonner-Léisung. Et misst ee sech drop astellen, dass d'Maternité zu Ettelbréck emol e puer Woche wäert zoubleiwen. Kuerzfristeg géif no enger pragmatescher Léisung gesicht ginn. Et wéilt een zesumme mat den anere Spideeler kucken, wéi een e Service zu Ettelbréck kéint assuréieren.

Landeswäit missten d'Garden awer sécher besser organiséiert a remuneréiert ginn. Dofir wier d'Politik zesumme mat de Spideeler an den Doktere gefuerdert. Gespréicher géifen do lafen an d'Ministesch seet sech do optimistesch.

Donieft hutt d'Gesondheetsministesch erkläert, firwat si elo rezent e Verbuet ausgeschwat huet fir een IRM an enger privater Praxis um Potaschbierg. Si géing sech do einfach un d'Gesetz halen, esou d'Paulette Lenert. 2018 wier d'Spidolsgesetz a Kraaft getrueden an dat géing e Monopol an deem Beräich kreéieren. D'Geriichtsurteel, wat 2019 en Faveur geschwat huet vun IRMen a privaten Praxissen, wier op Basis vum Dokteschgesetz geholl ginn an dat reegelt, wat dierf an enger privater Praxis gemaach ginn. Et géing awer hei och ëm d'Spidolsgesetz goen, dat méi rezent Gesetz. Do kéint ee sech froen, wou d'Logik wär, ma genee doru wier een och um schaffen, fir méi Koherenz eranzebréngen, esou d'Ministesch.

Invité vun der Redaktioun: Paulette Lenert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.