En Dënschdeg de Moie war de President vun der Doktesch- an Zänndokteschassociatioun AMMD eisen Invité vun der Redaktioun.

De Manktem un Dokteren hei am Land wier akut an dat aktuellt Spidolsgesetz wier net un d‘Realitéiten um Terrain ugepasst. Dat war d‘Kritik hei op RTL vun der Doktesch- an Zänndokteschassociatioun AMMD. Hire President Alain Schmit war den Dënschdeg de Moien Invité vun der Redaktioun. D‘Gesetz vun 2018 wier laanscht de Secteur an d‘Leit um Terrain geschriwwe ginn an déi temporär Fermeture vun der Maternité zu Ettelbréck wier ënnert anerem dorobber zeréckzeféieren.

De Manktem un Doktere wier awer an alle Beräicher e Problem a géing ënnert anerem och zu Retarde bei de Spezialiste genee wéi iwwerfëllten Urgencë féieren. Dobäi hätt d‘AMMD schonn 2014 virun dësem Problem gewarnt. Dem Alain Schmit no hätt een am Background mam Mars Di Bartolomeo hei op RTL de leschte Weekend eraushéieren, datt Joerzéngte laang "Gesondheetspolitik mat Gewerkschaftspolitik verwiesselt" gouf. Senger Meenung no misst ee pragmatesch sinn an dofir suergen, datt d’Leit emol en Hausdokter kréien an d’Spezialisten hir Aktivitéite solle kënnen ausbauen.

Datt d’Gesondheetsministesch Paulette Lenert net erlaabt, datt en IRM an enger privater Praxis kann a Betrib geholl ginn, kann den Alain Schmit och net novollzéien. Allgemeng huet de President vun der AMMD eng gewerkschaftlech Approche vun der Politik am Santéssecteur bedauert.

Invité vun der Redaktioun: Alain Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.