E Méindeg de Moie war de Spriecher vun der Partei Fokus eisen Invité vun der Redaktioun.

Et kann een net enger nächster Chamber d'Verantwortung an der Index-Fro iwwerloossen. Wann do e puer Tranchë beienee kéimen, dat ass net ze geréieren. Dofir mussen déi aktuell politesch Responsabel elo no Léisunge sichen. Dat seet de Fränk Engel.

De Spriecher vun der Partei Fokus war e Méindeg de Moien den Invité vun der Redaktioun. Mir hätten e massiven Desequiliber tëscht Akommes a Liewenskäschten an do géing och keng eemoleg Kompensatiouns-Logik hëllefen. Dernieft géing mordicus um Index festgehale ginn a mat deem géing de Problem vun den nidderege Revenuen net geléist ginn. Par Konter krite vill Leit Geld bäi, déi et net brauchen, sou de Frank Engel.

Am Dossier Carole Dieschbourg géing d'Chamber eng inacceptabel Inkompetenz un den Dag leeën. Hei misst d'Parlament elo dofir suergen, datt déi fréier Ministesch sech elo eng Kéier kéint erklären, amplaz datt Leit, déi gutt bezuelt ginn, permanent deier juristesch Avise froen.

Zum privaten IRM Potaschbierg seet de Fränk Engel, datt net alles muss an engem Spidol geschéien. Wichteg wier, datt d'Delaie verstänneg sinn an datt keng Zwou-Klasse-Medezin entsteet. Allerdéngs wier d'Argument vun enger Vernoléissegung vum ländleche Raum net valabel. Vu Jonglënster aus wier een och séier um Kierchbierg, sou nach de Spriecher vu Fokus.

Invité vun der Redaktioun: Frank Engel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.