Dat seet den CSV-Co-Fraktiounschef iwwert déi aktuell héich Spritpräisser am Grand-Duché. De Gilles Roth war eisen Invité vun der Redaktioun.

D'CSV wëll d’Reduktioun op de Spritpräisser iwwert den 31. Juli eraus verlängeren. Well d'Präisdeierecht géif bis wäit an d'Mëttelschicht eragoen, sot en Dënschdeg de Moien de Gilles Roth.

Am Ausland géif dat och gemaach ginn a vill Leit kéinten net op den Auto verzichten, besonnesch déi am ländleche Raum. Autofuere wär net de Privileeg vun e puer "happy few", also vun e puer Glécklechen. "Autofuere misst erschwénglech bleiwen." D’CSV wëll pragmatesch sinn an net ideologesch. Et wéilt een net wéi déi Gréng, mat Hëllef vu Blo a Rout, e Bensinnspräis iwwer 2 Euro ënnerstëtzen. Dat wär keen ideologesche Lenkungseffekt.

Datt elo manner Leit hei am Land tanken, well Däitschland jo och d'Präisser erofgesat huet, misst een awer och ekonomesch kucken, ënnersträicht de Gilles Roth. Den Tanktourismus géif dem Staatsbudget eng Milliard Euro d'Joer bréngen. Besonnesch déi Gréng géifen dat zwar net gären héieren. Dem Klima wär ee egal, ob een zu Schengen oder zu Perl tankt. Vum Tanktourismus wéilt jidderee fort, mä et bräicht een awer Alternativen. Déi géif een aktuell bei der Regierung net gesinn.

D'CSV wëll d'Leit och mat méi niddregen Accisen a Steieren entlaaschten, de Staat dierft an dësen Zäiten net och nach méi verdéngen. Méi Leit sollen och kënnen eng Energieprimm kréien.

Eng méiglech Impfflicht zu Lëtzebuerg war och Thema am Interview. Do gouf et keng kloer Äntwert vum CSV-Co-Fraktiounschef. Et wär haut, anescht wéi am Januar, en neie Moment, well aktuell mat den Omikron-Varianten d’Konsequenze manner grouss wären. Eng Impfflicht wär e graven Agrëff, déi misst, wa se kënnt, absolut noutwendeg sinn. De Gilles Roth huet der Regierung reprochéiert, datt verpasst gouf, am Fall wou se gebraucht gëtt, déi legislativ Viraarbecht ze leeschten. Fir d'Zukunft misst een e Pandemie-Gesetz hunn, also besser fir den Noutfall preparéiert sinn.

D'CSV huet sech als Partei jo en neie Look ginn. Et hätt een elo duebel, paritéitesch Spëtzten an en neie Logo. An d'Faarwe sollt een net ze vill eran interpretéieren, mengt de Gilles Roth. Sou e Logo wär ëmmer eng Affaire de goût. Senger Meenung no wieren et Faarwen, déi gutt eriwwer kommen. Si géife villäicht eppes Neits, eppes Modernes ausdrécken. Mä elo misst een als Partei natierlech kucken, d'Messagen ze vermëttelen a sech ëm d'Suerge vun de Leit bekëmmeren.

Invité vun der Redaktioun: Gilles Roth

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.