Well haaptsächlech Leit aus där Alterskategorie op der Intensivstatioun landen, misste si op d'mannst 3 Mol geimpft sinn, fir d'Spideeler z'entlaaschten.

Impfflicht - Rapport Expertegremium / Reportage Pit Everling

Leit iwwer 50 solle sech impfe loossen, fir d'Personal aus dem Alters- a Fleegesecteur gëtt awer keng Obligatioun méi recommandéiert. Den Expertegrupp huet en Dënschdeg de Moien den Avis complémentaire presentéiert an d'Aussoen aus dem Wanter also zum Deel revidéiert. D'Impfung wierkt viru schwéiere Verleef, a 95% virun engem Openthalt op enger Intensivstatioun oder virum Doud. Dat soen d'Zuelen, déi de Professer Dr Claude Muller, den Dr Gérard Schockmel, d'Dr Thérèse Staub, den Dr Vic. Arendt an de Professer Dr Paul Wilmes en Dënschdeg de Moie presentéiert hunn. Am meeschte concernéiert vu schwéiere Verleef concernéiert si Leit iwwer 50. Dofir géi bei hinnen eng Impf-Obligatioun Sënn maachen, besonnesch bei enger virulenter Variant. Well een op all Zenarie wëll virbereet sinn, recommandéieren d'Experten déi Flicht awer egal wéi.

Den Dr Gérard Schockmel erkläert: Ech perséinlech denken; mir hunn eis kloer fir eng Impfflicht fir Leit iwwer 50 ausgeschwat. Ech denken, d'Regierung ass an der Flicht fir Preparatiounen ze treffen, wann eng Well kënnt, bei där méi Leit krank ginn, méi Leit hospitaliséiert ginn, bei där méi Leit stierwen. Alles anescht wier fahrlässeg.

D'Leit iwwer 50 missten och 3 Dosisse gesprëtzt kréien, respektiv e Rappell, wann déi lescht Impfung méi wéi 5 Méint hier ass, esou den Infektiolog Dr. Vic Arendt. Eisen Avis ass weider, datt mer fir eng Obligation vaccinale iwwer 50 sinn, mat enger véierter Booster-Dosis. Déi ass jo aktuell scho recommandéiert fir Leit iwwer 50 a fir Leit mat Comorbiditéiten, einfach fir prett ze sinn. Mir wësse jo net, ob mer lo méi e virulente Variant kréien oder net.

Extrait Dokter Vic Arendt

De Grupp vun de 5 Experten huet sech en Dënschdeg de Moie géint eng sektoriell Impf-Obligatioun fir Leit aus dem Fleege- a Santéssecteur ausgeschwat. Do gëtt et also e Changement par rapport zum Wanter. De Schutz virun enger Iwwerdroung wier net héich genuch, sou den Dr Vic Arendt: Den aktuelle Vaccin, dee jo net géint Omikron developpéiert gouf, schützt net genuch virun enger Infektioun.

An der Plaz gëtt et awer eng Rei aner Recommandatiounen. Ënner anerem misst eng Informatiouns-Obligatioun fir den Impfstatus vum Personal kommen. Et hätt ee festgestallt, datt d'Couverture vaccinale beim Personal an den Alters- a Fleegeheemer niddereg ass, dat wier e Problem an dat géing den Experte Kappzerbrieches maachen.

Weider Mesuren, déi eng Impfflicht relativéieren, wieren iwwregens d'Responsabilitéit vum Médecin traitant, deen d'Riske vu senge Patiente géing kennen, sou wéi och den Asaz vun antiviralen Traitementer. Generell gesi kritt d'Regierung manner kloer Recommandatioune mat op de Wee wéi nach am Wanter, huet de Professer Dr Claude Muller betount: Mir hunn eisen Avis sou verstanen, dass mer der Regierung de Landscape, an deem se sech beweegt, erkläert hunn.

De Ball läit also lo bei der Regierung. Eigentlech sollt e Freideg eng Regierungsdeklaratioun an dono en Debat an der Chamber sinn. RTL-Informatiounen no ass d'Deklaratioun vum Staatsminister elo nächste Mëttwoch an d'Debatten en Donneschdeg.

Den Dr Gérard Schockmel huet och nach wësse gedoen, datt d'Wëssenschaftler net ënner de beschte Konditiounen un dësem Rapport konnte schaffen. Et wier een net fräi gestallt gewiescht, et wier och keng Remuneratioun virgesinn. Wëssenschaftler géinge mat wéineg Respekt behandelt ginn an de Stellewäert vun akademescher Aarbecht wier wuel weider nach ëmmer niddereg, bedauert den Dr Gérard Schockmel.

De Professer Dr Claude Muller, ee vun den Experten, déi den Avis ausgeschafft hunn, war den Dënschdeg den Owend am Journal dann och eisen Invité op RTL Télé Lëtzebuerg.