Dat sot den Infektiolog aus de Schuman-Spideeler iwwert d'Impfflicht fir Leit iwwer 50. Hie war e Mëttwoch eisen Invité vun der Redaktioun.

Elo misst sech op eng méiglech schwéier Well am Hierscht/Wanter preparéiert ginn. An dowéinst sinn d'Experte fir eng Corona-Impfflicht fir Leit iwwer 50 Joer.

Eng Impfflicht am Gesondheets-a Fleegesecteur kann aktuell net méi recommandéiert ginn, well de Vaccin net genuch virun enger Iwwerdroung vum Virus schützt. Et wier een net frou doriwwer, well den Impftaux beim Personal an de Spideeler an Altersheemer immens niddreg ass. Keng Impfflicht fir de Secteur heescht awer net, datt een de Leit net géif recommandéiere sech impfen ze loossen. Impfe wier nach ëmmer déi bescht preventiv Mesure géint de Covid, ënnersträicht den Dr. Schockmel. Si kéint duerch näischt ersat ginn. Mat der Impfung géif een eng Basisimmunitéit kréien, déi iwwer Jore geet. Een, dee guer net geimpft ass, hätt guer keng gutt Protektioun. Eng Infektioun kéint par Konter als gudde Booster ugesi ginn. Dee beschte Schutz wier "geimpft a genesen". Eng 4. Dosis géif besonnesch bei immungeschwächte Persounen a Leit iwwer 70 Sënn maachen.

Vun der Regierung erwaart sech den Dr. Schockmel, datt se dat mécht, wat se gesot huet an d'Recommandatioune vum Experterot iwwerhëlt. An zwar séier. Et wär schued, datt soulaang Zäit verschwent gi wär, fir sech uerdentlech ze preparéieren. Mä et wär ni ze spéit.

Den Experte-Grupp ass och fir e Pandemie-Gesetz, wou méi séier kann zum Beispill wann néideg eng Maskeflicht am ëffentlechen Transport decidéiert ginn.

Déi aktuell Omikron-Variante wären am Verglach mat Delta relativ ongeféierlech. Lo am Summer wär een och vill dobaussen. Mä well awer méi eng geféierlech Variant nees kéint kommen, misst ee virbereet sinn, sou den Dr. Gérard Schockmel.

Invité vun der Redaktioun: Gérard Schockmel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.