Dat war d'Ausso vum Direkter vum Statec. De Serge Allegrezza war e Méindeg eisen Invité vun der Redaktioun.

Et ass net auszeschléissen, datt dëst Joer nach eng weider Indextranche géing fälleg ginn. Den 3. August ginn déi neist Berechnunge verëffentlecht, sou den Direkter vum Statec, de Serge Allegrezza, de Méindeg de Moien hei op RTL. Bis ewell war den nationale Statistik-Büro dovunner ausgaangen, datt eventuell ugangs 2023 eng weider Indextranche géing erfalen. Duerch d'Entwécklung vun der Präisdeierecht kéint dat awer wuel nach éischter sinn. Am Géigesaz zu de Previsiounen am Fréijoer misst een elo dovunner ausgoen, datt d'Inflatioun däitlech méi héich wäert leien. De Serge Allegrezza sot, am Fall vun engem Krich an der Ukrain, deen undauert, kéint et d'nächst Joer 3,4% Inflatioun ginn.

Dem Accord vun Enn Mäerz no soll et net méi ewéi eng Indextranche bannent engem Joer ginn. Theoretesch kéinten esou am Abrëll d'nächst Joer direkt puer Tranchen ausbezuelt ginn. D'Regierung an d'Sozialpartner haten awer schonn annoncéiert, datt d'Tripartite nees zesummekënnt, wann eng weider Indextranche fälleg gëtt. Dem Serge Allegrezza no riskéieren d'Diskussiounen, vill méi fréi unzefänken a méi intensiv ze sinn.

De Statec wier och amgaangen ze modelléieren, wéi een Impakt e komplette Gas-Stopp vu Russland op d'wirtschaftlech Entwécklung hei am Land huet. Dofir bréicht een awer nach den Entlaaschtungsplang vun der Regierung. Dora wäert ënnert anerem präziséiert ginn, wéi eng Fabricke musse méi lues maachen, wann de Gas géing knapp ginn. Et hätt ee versprach kritt, dee Plang deemnächst matgedeelt ze kréien, esou de Serge Allegrezza.

Reaktioun op Kritik vum OGBL

Wat d'Kritik vum OGBL ugeet, sot de Serge Allegrezza, datt den OGBL an d'Chambre des salariés bei hirer Analys vun de Mesurë vun der Tripartite eng aner Approche haten. Den OGBL hat virun 2 Woche kritiséiert, datt duerch d'Verréckele vum Index et och bei den ënneschte Revenue Verléierer ginn an dat trotz de Steierkreditter. Den Direkter vum Statec huet erkläert, datt Enn Mäerz op der Tripartite gekuckt gouf, fir do ze kompenséieren, wou d'Depensë méi geklomme sinn ewéi d'Revenuen. Béid Approchë wieren awer justifiéiert, esou de Serge Allegrezza.

Hien huet awer och zouginn, datt et grouss Ënnerscheeder – eng Heterogenitéit – bei de verschiddene Stéit a Revenuen a bei de Comportementer gëtt. Dat kéint ee berechnen, mee dat géing d'Saach immens komplizéiert maachen. Als Statec wier ee scho frou, datt hir sozial selektiv Approche vun de Quintillen ugeholl gouf, also d'Opdeelung vun de Revenuen a 5 Kategorien.

Invité vun der Redaktioun: Serge Allegrezza

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.