Dat sot de President vun der Federatioun vun de Lëtzebuerger Baufirmen an dem Génie Civil. Hie war e Freideg de Moien eisen Invité vun der Redaktioun.

Zwou Indextranchë mateneen auszebezuelen, hält de Roland Kuhn net fir "machbar". Wat een am Handwierk brauch, wär Previsibilitéit, sou den Entrepreneur a President vun der Federatioun vun de Lëtzebuerger Baufirmen an dem Génie Civil.

Wat een am Handwierk brauch, wär Previsibilitéit. Et hätt een elo eng Situatioun, déi een nach ni kannt hätt. Et wär ëmmer biergop gaangen. Elo géif een net wësse wat muer ass an et wär schwiereg, fir Präisser ze maachen a se ze halen.

Eng Indextranche fir enger Baufirma vun 250 Employéeë wier, wéi wann ee vun haut op muer 6 bis 7 Leit méi kritt. Dës ze verréckele géing jo och net heeschen, se ofzeschafen. Leit déi e Besoin hätten, krite jo substantiell gehollef. D’Margë vun de Betriber wieren den Ament minimal, an et misst och fir si méiglech bleiwe Suen ze verdénge fir ze investéieren.

D'nächst Woch komme jo nei Previsioune vum Statec eraus. Wat soll gemaach géint d'Inflatioun? Wéi soll et weidergoe mam Index? De Roland Kuhn wollt dozou näischt soen, mä iwwerléisst dat deene Patronen, déi bei de Verhandlungen derbäi sinn.

Um Bau feelt awer Personal. An den nächste 5 Jore géingen 30 Prozent an d'Pensioun goen. Elo scho misst méi pre-fabrikéiert ginn. Well et ëmmer manner Steemetzer gëtt. Déi misste besser agesat ginn. Ma et géinge permanent Weiderbildunge fir d'Salariéen gemaach ginn.

E Freideg fänkt jo de Kollektivcongé fir de Bau un, e Méindeg kommen d'Installateuren derbäi. Kollektivcongé ass wichteg, fir datt a Rou 3 Woche ka Vakanz gemaach ginn, seet de Roland Kuhn. Speziell fir d'Salariéen, mä och besonnesch fir kleng Patronen, déi dann och mol kéinten duerchootmen.

Kritiséiert huet de Roland Kuhn nach, datt de Bau vu Logementer net séier genuch géing virugoen, well d'Prozeduren ze komplex wieren. D'Natur misst geschützt ginn, sou den Entrepreneur. Wann awer e PAG vun der Gemeng gestëmmt ass, soll d’Natur direkt kompenséiert ginn, soudatt ka gebaut ginn, soubal de PAP op en Terrain ugefrot gëtt.

Invité vun der Redaktioun: Roland Kuhn

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.