En Donneschdeg de Moie war den DP-Fraktiounschef eisen Invité vun der Redaktioun.

Den aktuellen Tripartite-Accord gëllt fir d’DP zu 100%. "Mir kënnen en de Moment net a Fro stellen", sot de liberale Fraktiounschef Gilles Baum en Donneschdeg de Moien hei op RTL, dat obwuel déi ze héich Präisdeierecht laut Statec méi laang unhale soll ewéi am Mäerz nach geduecht. Fir d’DP soll et also dobäi bleiwen, datt bis Enn 2023, also bis no den nächste Chamberwalen, maximal eng Indextranche pro Joer kann ausbezuelt ginn. All weider Indextranche, ewéi déi vu Juli oder déi di Enn vum Joer kéint fälleg ginn, misst deemno verréckelt ginn.

De Gilles Baum huet widderholl an ënnerstrach, datt keng Tranche soll ewechfalen. Well awer d’Betriber riskéieren zwou, wann net méi Tranchen am Joer 2024 mussen ze bezuelen, misst dem Gilles Baum no déi nächst Regierung, egal ewéi déi ausgesäit, Ufanks 2024 eng nei Tripartite aberuffen, fir ze kucken ewéi se mat den Tranchen ëmgeet.

Op der Tripartite am Hierscht misst ee kucken, wéi eng Léisungen ee kéint fannen, fir de Kafkraaftverloscht ze kompenséieren. Op d’Fro, ob en neien Akkord Enn vum Joer net kéint deen aktuellen annuléieren, huet den DP-Fraktiounschef dann awer geäntwert, dat wier eng Méiglechkeet.

An op d’Fro, ob dann awer nach Sputt am Staatsbudget wier, fir de Leit an de Betriber finanziell ze hëllefen, huet de Gilles Baum geänwert, d’Koalitioun hätt sech nach Sputt gelooss, andeems se zum Beispill d’Steierbarèmen net un d’Inflatioun ugepasst huet, well déi 600 Milliounen Euro d’Joer kascht hätt.

De Wirtschaftsminister Franz Fayot huet e Mëttwoch den Owend am Interview bei eis op der Tëlee vu «kreative Léisunge» geschwat, déi néideg wieren.

De Gilles Baum huet iwweregens och gesot hien hätt "och kee Problem domadder", wann d'Deputéiert an Zukunft net méi hallef, mee ganz besteiert ginn. Den LSAP-Fraktiounschef Yves Cruchten hat sech och schonn hei op RTL dofir ausgeschwat. Déi gréng Parteipresidentin Djuna Bernard sot eis um Bord vun hirem Presseiesse viru puer Wochen, si wier och dofir, datt d'Deputéiert wéi di aner Leit besteiert ginn.

Invité vun der Redaktioun: Gilles Baum

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.