Dat fuerdert den Energieminister am Kontext vun den zolitten Haussë vun de Gaspräisser als eisen Invité vun der Redaktioun e Freideg.

E Freideg mécht d'Regierung de Point vun der aktueller Situatioun bei der Energie-Versuergungssécherheet a beréit  och driwwer, wéi eng Hëllefe méiglech sinn. Dat sot den Energieminister Claude Turmes als eisen Invité vun der Redaktioun. Hien huet awer vu séiere Léisunge geschwat, fir de Leit an de Betriber ze hëllefen.

D'Decisioune wéi konkret gehollef gëtt, mécht d'Regierung awer och vun den neien Zuele vum Statec ofhängeg. Déi sollen eisen Informatiounen no réischt ëm den 12. September en vue vun enger weiderer Bipartite-Ronn kommen.

Séier cibléiert Hëllefe mat der Tripartite zesummen

Am Oktober klammen d'Gaspräisser jo zolidd ëm ronn 90% an d'Regierung wier sech bewosst, datt et schwéier Zäite sinn. Et wéilt een dowéinst cibléiert deenen hëllefen, déi am meeschte Problemer hunn, awer an Ofsprooch mat de Sozialpartner. Déi gréng Parteipresidente waren dës Woch virgeprescht an haten direkt Hëllefe gefrot. Eppes, wat deenen anere Majoritéitsparteie sauer opgestouss ass. Fest steet, et dierfte méi Leit vun enger neier Hëllef profitéieren. Et géif ee keen am Ree stoe loossen, sot de grénge Minister.

Den Tankrabatt, deen en Donneschdeg jo ausgelaf ass, huet d'Regierung bekanntlech net verlängert. D'Mesure wier net sozial a géif sech och net rechnen, sou de gréngen Energieminister. Besser wier et déi Suen ze huelen, fir de Leit méi geziilt ze hëllefen.

"Beim Spueren ass et wichteg, datt jidderee mat mécht"

Wat den nationalen Energie-Spuerplang ugeet, deen d'nächst Woch en Donneschdeg virgestallt gëtt, schwätzt de Claude Turmes vun enger Solidaritéit, déi gebraucht gëtt. All EU-Land soll elo mol fräiwëlleg bis Mäerz 15% Gas spueren. Jidderee misst matmaachen. De Staat, d'Gemengen, d'Betriber an och d'Privatleit.

Kloer ass schonn, datt ëffentlech Gebaier just nach bis op 20 Grad solle gehëtzt ginn, d'Gäng guer net. Bei der Beliichtung soll gespuert ginn. Den Detail gëtt wéi gesot d'nächst Woch mat der ganzer Spuer-Campagne presentéiert. Wichteg wier, datt d'Leit gesinn, datt Regierung a Gemengen hir Aarbecht maachen.

Den Energiespuer-Plang gëtt e Freideg de Moien am Detail am Regierungsrot virgestallt. E Freideg de Mëtteg ass dann nach eng weider Reunioun mat der Fedil an de Ressortministeren Delles a Fayot geplangt. De gréissten Energieverbraucher ass bekanntlech d'Industrie.

Den Energieminister ass zouversiichtlech, datt een dat viséiert Spuerzil mat engem kollektiven Effort fräiwëlleg erreecht.

Datt Lëtzebuerg beim Spueren Zäit verluer hätt, gesäit de Claude Turmes net esou. Et hätt ee bewosst d'Campagne fir den Ufank vun der Heiz-Period virgesinn. D'Spuercampagne kéim zum richtegen Zäitpunkt.

De Stroum als neit Suergekand: Versuergungssécherheet a Gefor

D'Gasspäicher an Europa sinn iwwerall aktuell gutt gefëllt, do hätt ee gutt geschafft. Och géif méi Flësseggas geliwwert ginn. Dem Claude Turmes no stéing ee bei der Gasversuergung elo definitiv besser do. Duerfir annoncéiere sech awer beim Stroum Problemer bei der Versuergungssécherheet. Wéinst der Dréchent feelt Stroum aus Waasserkraaft. An et gëtt grouss Schwieregkeete mat de franséischen Atomreakteren, déi deels wéinst Korrosioun vum Netz geholl goufen. Zu Cattenom zum Beispill sinn elo mol 3 vun de 4 Reaktere bis November aus.

E Freideg an enger Woch ass eng Krisereunioun vun den EU-Energieministeren. Do misst ee gewuer ginn, wéi vill franséisch Atomreakteren iwwerhaapt am Wanter lafen. Aktuell gëtt de Stroumpräis jo vum deiere Gas gedriwwen, vum deierste Kraaftwierk bestëmmt. Et wär schwiereg de Stroummarché ze reforméieren, esou den Energieminister, deemno de Maartdesign vum Stroum an der Vergaangenheet duerchaus gutt funktionéiert hätt. D'Stroumversuergung misst op jiddefalls sécher bleiwen. A besonnesch fir e Land wéi Lëtzebuerg, dat just 15 bis 20% Stroum selwer géif produzéieren, misst een oppassen, datt d'Grenzen oppe bleiwen. De Grand-Duché mécht sech dowéinst fir eng europäesch Léisung staark.

D'nächst Joer riskéiert och de Stroum vill méi deier ze ginn. Elo scho wëll d'Regierung diskutéieren, wat ee ka maachen, fir ze hëllefen. De Staat wäert do aller Viraussiicht no, wéi scho beim Gas, d'Reseauskäschten iwwerhuelen. Et wéilt een éischter de Leit hëllefen, amplaz de Stroumpräis um Maart ze deckelen.

Op der anerer Säit wier a ganz Europa kloer, datt d'Äntwert op déi aktuell Kris den Ausbau vun den erneierbaren Energië misst sinn. Do géif sech och ganz vill doen.

Invité vun der Redaktioun: Claude Turmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.