Där Meenung ass d'Cheffin vun der Lëtzebuerger Vertriedung vun der EU-Kommissioun als eis Invitée vun der Redaktioun.

D'Vertriederin vun der EU-Kommissioun zu Lëtzebuerg ass zouversiichtlech, datt d'Super-Profitter vun Energiekonzerner ganz séier wäerte kënne bei de Bierger ukommen.

De Krich an der Ukrain an d'Energiekris waren d'Haaptsujeten e Mëttwoch an der Ried zur Lag vun der Unioun vun der Kommissiounspresidentin Ursula von der Leyen. Dat Soziaalt, d'Klima- an d'Biodiversitéitskris sinn net vergiess, sou d'Anne Calteux den Donneschdeg de Moien hei op RTL. Si huet betount, datt Super-Profitter vun Energiekonzerner elo gedeckelt an a Richtung Bierger ëmgeleet wäerte ginn. Déi Mesure – ënnert anerem – misst virun Enn vum Mount per qualifizéiert Majoritéit am Conseil ugeholl ginn, sou datt déi Super-Profitter dem Anne Calteux no scho vum 1. Dezember un un d'Memberstaate kéinten ëmverdeelt ginn.

D'Memberstaate mussen dann dofir suergen, datt déi Sue beim Bierger ukommen. Doriwwer eraus hätt d'Europäesch Unioun genee ewéi wärend der Pandemie de Memberstaaten am Beräich vun de Staatshëllefen e ganz flexibele Kader ginn, fir de Betriber ze hëllefen. Wat d'Klimakris ugeet, wier de Klimafong geschaaft ginn, fir och do déi sozial Dimensioun eranzekréien. A wat d'Biodiversitéit ugeet, hätt d'EU wëlles, sech op der Uno-Konferenz zu Montreal am Dezember ganz staark fir en ambitiéisen Akkord anzesetzen, genee sou wéi se dat wéilt op der COP27-Klimakonferenz zu Doha am November maachen.

De Reproche, vun der ADR notamment, datt d'europäesch Sanktioune géint Russland fir déi héich Energiekäschte verantwortlech wieren, huet d'Anne Calteux net gëlle gelooss. Aner Facteuren, ewéi d'Reprise vun der Ekonomie no der Pandemie, hätten och d'Inflatioun verstäerkt. Si huet och behaapt, d'Sanktioune wieren effikass, well Russland ëmmer méi ekonomesch Problemer hätt. Et hätt een och net kënnen nokucken, ewéi Russland mat senger Invasioun vun der Ukrain géint internationaalt Recht verstouss huet. An hiren Ae wier de Krich och net just géint d’Ukrain, mee och géint d'Europäesch Unioun: "E geet och géint eis Wäerter hei an Europa, géint eis Demokratie, géint eis Ekonomie, géint eis Energie a géint eis Zukunft", sou d'Anne Calteux. D'Sanktiounen hunn och misse sinn, well "Russland einfach keen zouverléissege Partner" méi ass, sou nach d’Vertriederin vun der EU-Kommissioun zu Lëtzebuerg.

Wann d'EU elo Gas aus Amerika oder aus Aserbaidjan keeft, huet d'EU et da mat zouverléissege Partner ze dinn? Op déi Fro huet d’Anne Calteux geäntwert, datt Europa am Gaang wier, seng Partner anescht auszesichen ewéi virdrun. Et géing ënnert anerem gekuckt, ewéi et mat der Demokratie an anere Länner steet. Si huet de "Global Gateway" genannt: en neie Programm, dee virum Krich an der Ukrain schonn an d'Liewe geruff gouf an dofir suergt, datt, wann d'EU an Drëttstaaten investéiert, och gekuckt gëtt, datt europäesch Valeuren a Standarde respektéiert ginn.

Invité vun der Redaktioun: Anne Calteux

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.