E Mëttwoch de Moie war d'Chargée de direction vu Luxembourg Stratégie eis Invitée vun der Redaktioun.

Wéi gesäit d'Lëtzebuerger Wirtschaft 2050 aus? Fir dorop eng Äntwert ze ginn, goufen am Wirtschaftsministère verschidden Zenarien ausgeschafft, dat vun der Plattform "Luxembourg Stratégie".

Invité vun der Redaktioun: Pascale Junker

D'Chargée de Direction dovunner, d'Pascale Junker, war e Mëttwoch de Moien eis Invitée vun der Redaktioun. D'Konklusiounen an déi zukünfteg Ausriichtung vun der Lëtzebuerger Ekonomie 2050 sollen allerdéngs eréischt am Mäerz vum Wirtschaftsministère festgehale ginn.

Et géif drëm goen, d'Nues aus dem Guidon ze huelen a méi wäit ze kucke wéi déi aktuell Krisen, sou d'Pascale Junker. Dat fir mat Recul haut scho besser Decisiounen ze huelen.

"Luxembourg Stratégie" wier interesséiert un der laanger Zukunft. Och wann ee sech bewosst wier, datt d'Betriber den Ament ganz aner Problemer hunn. Allgemeng wier et dacks sou, datt d'Prospektiv - also Etüden, déi an d'Zukunft geriicht sinn - et net fäerdeg bréngen, datt hire Message bei de politesch Responsabelen Uklang fënnt, huet eis Invitée vun der Redaktioun zouginn. Ma de Wirtschaftsministère hätt sech bewosst mat "Luxembourg Stratégie" d'Moyene ginn, fir méi wäit no vir ze kucken.

De Grupp vun aktuell fënnef Leit huet am Mee zejoert ugefaange mat schaffen. Erkläerten Zil ass et, fir d'Lëtzebuerger Ekonomie méi kompetitiv, inklusiv, widderstandsfäeg an nohalteg ze maachen. Duerfir goufen dräi méiglech Zukunfts-Zenarie mat ville Vertrieder aus der Zivilgesellschaft an der Ekonomie ausgeschafft.

Am éischten Zenario bleift alles wéi et ass. Am zweeten Zenario gëtt alles méi regional, d'Populatioun an Ekonomie wuesse manner. Am drëtten Zenario gëtt et nach méi ekonomeschen an demographesche Wuesstem wéi elo an et gëtt ganz staark op d'Digitalisatioun gesat.

Aktuell Krise wieren och  consideréiert, sou d'Pascale Junker. D'Krise géifen alles dominéieren. Den Ausbléck vun den Zenarie wier och net ëmmer ganz optimistesch.

Ze soen, wéi een Zenario dee beschten a wéi een am probabelsten ass, wier awer net d'Aufgab vu "Luxembourg Stratégie". Et wier un Aneren, fir d'Method, déi ausgeschafft gouf, ze benotzen a Strategien op Basis dovunner festzeleeën. Dat kéint de Ministère sinn, grad wéi och eenzel Entreprisen, ONGen a Privatleit. Et wier u jidder Eenzelem ze kucken, wat ee mat der Zukunft maache wëll.

D'Conclusioune sollen am Mäerz vum Wirtschaftsministère presentéiert ginn.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.