Dat huet déi fréier DP-Politikerin e Freideg de Moie betount. Si war eis Invitée vun der Redaktioun.

D'Verdeelung vun der Futtballweltmeeschterschaft un de Katar am Joer 2010 annuléieren, wier schwiereg gewiescht, sou d'Anne Brasseur e Freideg de Moien op RTL. Déi fréier DP-Politikerin hat 2018 fir den Europarot e kritesche Rapport iwwert d'international Futtballfederatioun geschriwwen.

An hiren Ae wier et deemools an haut nach schwiereg, fir ze beweisen, datt beim Vott iwwert d'Weltmeeschterschaften am Joer 2010 eppes falsch gelaf ass. Et géing awer "Zesummenhäng" ginn, sou d'Anne Brasseur. Als Beispill huet si eng Invitatioun vum fréiere franséische President Nicolas Sarkozy un den UEFA-Chef Michel Platini a Katarien genannt, fir an den Elysée iessen ze kommen.

Egal wéi wier et deemools e Skandal gewiescht, dem Katar d'WM ze ginn. Aus ekologesche Grënn, mä och, wann ee kuckt, ewéi déi Jore virun der WM Aarbechter mësshandelt goufen a souguer gestuerwe sinn. Wie géing mengen, et kéint ee mat sportlechen Evenementer esou Länner positiv beaflossen, dee géing sech ieren, huet d'Anne Brasseur widderholl. Déi fréier Politikerin huet op d'Wanterspiller 2014 zu Sotchi a Russland higewisen an op d’olympesch Spiller 2008 zu Peking: "do huet sech näischt geännert, au contraire".

D’Anne Brasseur huet un den éischte Saz an hirem Rapport vun 2018 erënnert: "Ze mann Sue schued dem Fussball, ze vill Sue mécht e futti".

Team Polfer oder Team Cahen?

D’Anne Brasseur war fréier och Schäffin an der Stater Gemeng. Mir hu si och gefrot, ob si éischter fir d'Lydie Polfer oder d’Corinne Cahen als DP-Spëtzekandidatin an der Stad ass. Si huet geäntwert si wéilt dat net kommentéieren, mä si hätt natierlech eng Meenung. An déi wier, datt d'Stad aktuell "formidabel" gefouert gëtt. Si wier frou, jorelaang mam Lydie Polfer zesumme geschafft ze hunn an elo nach befrënnt ze sinn.

Invité vun der Redaktioun: Anne Brasseur

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.