En Donneschdeg de Moie war de Kannerdokter a President vun der Sociétéit vun de Pediateren, de Serge Allard, eisen Invité vun der Redaktioun.

D'Zuel vu Bronchiolitten ass dëst Joer héisch. D'Bronchiolite ass eng Bronchite vun de Kanner ënner zwee Joer. E Virus, den RSV, provozéiert Otemproblemer. D'Kannerklinik ass wéinst dem Virus am Moment iwwerfëllt, mee den Dokter Serge Allard, de President vun der Societéit vu Kannerdoktere sot en Donneschdeg de Moien hei op RTL, d'Situatioun wier stabel.

56 Kanner sinn an der Kannerklinik hospitaliséiert, 37 wéinst enger Bronchiolite. All Zëmmer ass quasi duebel beluecht. Eng 3-4 Puppelcher musse souguer op der Intensivstatioun kënstlech beotemt ginn. Wéinst deene ville Fäll hunn all chirurgesch Operatioune bei de Kanner missen op d'nächst Joer verluecht ginn, ausser et ass e klengen Agrëff, wou een nach den Dag selwer heem kann.

Den RSV ass u sech en ale Bekannten. All véier Joer gëtt et méi eng uerg Epidemie. Firwat et dëst Joer méi schro ass, ass net net kloer. Den Dokter Allard huet erkläert, datt an Australien, wou de Virus sech schonn éischter verbreet huet an d'Laboratoiren do vill RSV vum "Typ A" fonnt hunn. Ob deen Typ méi aggressiv wier oder wéi d'Situatioun hei am Land ass, dat wéisst de Kannerdokter net, mee et géing een d'Resultater vu Recherchë weider am A halen.

D'Haaptrecommandatiounen, fir de Bëbee ze schützen, sinn u sech déi selwecht wéi beim Covid: Infizéiert Mënschen evitéieren, net dat klengt Kand zum Beispill an de Buttek mathuelen, Familljereunioune kleng halen an d'Bomi mat Schnapp soll de Mask undinn. Eng Zort "Bulle" ronderëm de Bëbee schafen, sou den Dokter Allard.

Allgemeng ginn et net genuch Kannerdokteren hei am Land. D'Pediatere musse Gas ginn, fir sou vill Kanner wéi méiglech ze gesinn, sot den Dokter Allard. Net vill Jonker wielen de Beruff an d'Populatioun wiisst. Hie proposéiert, datt Lëtzebuerg Projeten an den Universitéiten an den Nopeschlänner ze finanzéieren, fir méi Plaze fir Kannerdokteren ze schafen. Well Studente wieren do a Konkurrenz mat lokalen "Matadoren" an d'Plaze limitéiert. Den Dokter Allard hat scho Gespréicher doriwwer mam Direkter vun der Santé, dem Jean-Claude Schmit.

Invité Redaktioun: Serge Allard

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.