E Méindeg de Moie war de Benevolat d'Thema an der Emissioun "Invité vun der Redaktioun".

Den Interessi fir d'Benevolat wier do, ma et brauch een awer eng nei Dynamik, fir d'Benevollen an d'Associatiounen, déi der brauchen, zesummenzebréngen. Dat sot d'Presidentin vun der Agence du Bénévolat, d'Dr. Martine Mergen am RTL-Interview e Méindeg de Moien. Um Dag vum Benevolat war si eis Invitée vun der Redaktioun.

Fréier wier de Benevolat e liewenslaangt Engagement gewiescht. Wann de Bopi an de Pompjeeë war, waren de Fils an d'Enkelen dat dacks och, esou d'Martine Mergen. Haut wier dat anescht, et wier och eng Demande do, fir souzesoen am "Home Office" kënne Benevolat ze maachen. Dowéinst misst sech d'Agence och méi breet opstellen.

Nei Plattform, fir benevole Missiounen ze fannen

Wat d'Secteuren ugeet, esou wier virun allem am Beräich vun der Integratioun Demande do. Zum Beispill, wéi vill Leit aus der Ukrain op Lëtzebuerg hu misse flüchten, wier vill Engagement do gewiescht, fir déi Leit opzehuelen an hinnen ze hëllefen. Och wéi ee Sproochecoursen ubidde kann, wier dacks gefrot ginn. D'Agence du Bénévolat hofft natierlech, dass de Krich net laang unhält. Ma et wier awer wichteg, wa Besoin do ass, séier kënnen ze handelen, fir dass Benevoller déi oppe Missioune fannen, wou een eng Hand mat upake kann.

E wichtegen Outil wier dofir d'Internet-Plattform benevolat.lu. Do kann ee gesinn, wou ee sech a senger Géigend engagéiere kann. Hei kënne sech d'Leit och aschreiwen an uginn, a wéi enge Beräicher se wëlle benevole schaffen.

Campagne "Schenk deng Zäit" fir Chrëschtdag

Besonnesch an der Chrëschtzäit a wa mam neie Joer déi gutt Virsätz kommen, wéilte sech méi Leit fir de gudden Zweck asetzen. Dofir lancéiert d'Agence du Bénévolat zesumme mam Familljeministère d'Campagne "Schenk deng Zäit". Da kéint ee fir Chrëschtdag Zäit schenken amplaz eppes Materielles.

Op hir politesch Karriär ugeschwat, sot déi fréier CSV-Deputéiert Martine Mergen, si wéilt keng aktiv Politik méi maachen an deementspriechend och net mat an d'Wale goen.

Invité vun der Redaktioun: Martine Mergen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.