En Dënschdeg de Moien hu mer een Etat des lieux vun der aktueller Corona-Situatioun an der Emissioun "Invité vun der Redaktioun" gemaach.

Et kann een de Coronavirus elo praktesch wéi eng normal Gripp ugesinn. D'Symptomer wieren net méi sou schlëmm. Déi meescht Leit wieren asymptomatesch oder hätte liicht de Schnapp an den Hals wéi. Fir vulnerabel Leit bleift de COVID allerdéngs méi geféierlech. Dat sot den Infektiolog Dr Vic Arendt. Hie war en Dënschdeg de Moien eisen Invité vun der Redaktioun. Vulnerabel Leit a Persounen iwwer 60 Joer, sollen dowéinst eng 4. Impfung maache loossen.

D'Evolutioun vum Coronavirus wier gutt. Mëttlerweil hätte mer nämlech eng zolidd Herdenimmunitéit areecht, well vill Leit sech impfe gelooss hunn an déi aner sech souwisou zum groussen Deel mam Omikron infizéiert hätten, sou den Invité. Déi lescht Virus-Variante wieren och manner schlëmm gewiescht. Den Infektiolog géing awer nach net direkt déi véier Deeg Isolatioun am Grand-Duché ophiewen.

Grippesaison méi "hefteg" wéi soss

Wat d'Gripp ugeet, misst ee constatéieren, dass dës Saison däitlech méi hefteg wier, wéi soss. Duerch de Confinement an d'Masken déi lescht zwee Joer konnt de Grippevirus, grad wéi all déi aner respiratoire Viren, net wierklech zirkuléieren an dofir ass keng grouss Herdenimmuntéit entstanen. Elo géing de Virus also quasi "ophuelen".

D'Grippesaison hätt och éischter ugefaangen, wéi soss. Dëst Joer schonn am Oktober. D'lescht Woch wier ee bei 600 Fäll gewiescht, dat wieren der 2,5 mol méi wei soss. D'Gripp-Infektioune géingen awer elo och nach 10 bis 14 Deeg an d'Luucht goen, bis se hiren Héichpunkt erreecht hunn. Och bei der Gripp réit den Dr Vic Arendt vulnerabelen an eelere Leit, sech impfen ze loossen. Corona a Gripp-Impfunge kéinten och zesumme gemaach ginn.

Kannerspidol nach ëmmer un der Limitt

A punkto RSV, de Virus, deen zu Bronchiolitte bei klenge Kanner féiert, géing een elo eng liicht Baisse feststellen. Mä d'Kannerklinik wier nach ëmmer komplett beluecht an och déi programméiert Chirurgië wieren nach ëmmer ausgesat.

D'Situatioun wier also nach net entspaant. D'Spidol fir Kanner wier massiv iwwerlaascht gewiescht. Et hätt ee misste 16 nei Better bäimaachen an den Hôpital du jour wier an eng Statioun ëmgewandelt ginn. Den Dr Vic Arendt rappelléiert, dass ee versiche soll, d'Puppelcher sou gutt et geet vun den anere Kanner ewech ze halen.

Invité vun der Redaktioun: Dr Vic Arendt

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.