De Larry Ten Voorde gouf nodréiglech zum Gewënner vun der Course zu Budapest deklaréiert, nodeems de Marvin Klein net méi genuch Sprit am Tank hat.

Déi éischt Ronne sinn net ideal fir den Dylan Pereira gelaf, direkt hat hien 2 Plaze verluer an ass op de Rang 9 zeréckgefall. Och de Restart hannert dem Safety Car war net ideal verlaf fir den Lëtzebuerger, deen no enger Kollisioun an der éischter Kéier op d'Plaz 20 zeréckgefall ass. Un der Spëtz ass de Klein virum Ten Voorde an Evans bliwwen.

Plaz ëm Plaz huet sech den Dylan Pereira dunn nees no vir gekämpft, ma fir eng Top 10 Plaz sollt et net méi duergoen. Um Schluss koum hien op der 12. Plaz iwwert d'Arrivée.

De Klein dogéint ass eng souverän Course un der Spëtzt gefuer a konnt sech d'Plaz uewen um Podium sécheren, dat virum Ten Voorde an Evans.

Klein disqualifizéiert
Laang konnt de Klein sech awer net iwwert seng Victoire freeën, well hie gouf nodréiglech disqualifizéiert. Et ass virgeschriwwen, dass no der Course nach mussen op d'mannst 2 Kilo Sprit am Tank sinn. Dat war beim Klein net de Fall. Deemno gouf de Larry Ten Voorde nodréiglech zum Gewënner deklaréiert.

Domat réckelen d'Piloten hannendrun dann och alleguerten eng Plaz no vir, woumat den Dylan Pereira um Enn den 11. gëtt.