Beim Grousse Präis vum Katar konnt sech de Lewis Hamilton souverän virum Max Verstappen duerchsetzen. Drëtte gëtt de Fernando Alonso.

No enger souveräner Leeschtung konnt sech de Lewis Hamilton virum Max Verstappen an dem Fernando Alonso beim éischte Grousse Präis vum Katar duerchsetzen. De Fernando Alonso huet et am Verglach zu deenen aneren mat engem eenzege Stopp riskéiert a gouf belount. Esou konnt e sech virum Sergio Perez halen. Fir de Spuenier ass et den éischte Podium zanter 7 Joer.

Am General hëlt de Lewis Hamilton 6 Punkten op an huet domadder just nach e Retard vun 8 Punkten op de Max Verstappen.

De Max Verstappen hat en exzellente Start erwëscht a konnt sech bei dësem direkt ëm 3 Plazen op déi 4. Plaz no vir kämpfen. An der 4. Ronn huet den Hollänner sech dann och nach de Pierre Gasly gekroopt an an der 5. Ronn konnt och de Fernando Alonso näischt dem Hollänner entgéintsetzen a war domadder Zweeten hannert dem Lewis Hamilton. Dono sinn déi zwee an enger eegener Liga gefuer an haten e grousse Virsprong virun deenen aneren.

De Valtteri Bottas ass mat sengen éischte Pneue ganz laang dobausse bliwwen a wéi en op der 3. Plaz louch, krut en e platten an huet doduerch vill Plaze verluer. Kuerz viru Schluss huet Mercedes de Finn souguer aus der Course geholl.

Kuerz hat de Max Verstappen Drock op de Lewis Hamilton gemaach, konnt de Retard op ronn 6 Sekonne verkierzen, mee fir d'Pneuen ze schounen, huet en nees bëssen Tempo erausgeholl, sou datt de Lewis Hamilton seng Féierung souverän bis zum Schluss verdeedegt huet. Déi schnellste Ronn ass awer de Max Verstappen gefuer an huet sech domadder den Extra-Punkt geséchert.

Et kann ee sech also spannend zwou lescht Courssen a Saudi-Arabien an Abu Dhabi erwaarden an deenen dann d'Entscheedung ëm de Weltmeeschtertitel fält.