Beim Optakt vun der Rallye-Saison 2022 gewënnt de Sébastien Loeb op Ford Puma virum Sébastien Ogier (Toyota Yaris) an dem Craig Breen (Ford Puma).

De Sébastien Loeb huet bei sengem Retour an d'Rallye-Weltmeeschterschaft direkt eng Victoire kënne feieren. No der leschter Manche e Sonndeg hat den néngfache Weltmeeschter bei der Rallye Monte-Carlo eng Avance vun 10,5 Sekonnen op den Zweetplacéierte Fransous Sébastien Ogier op Toyota, well den Ogier an der Powerstage ze fréi gestart war an dofir eng 10-Sekonnen-Zäitstrof kasséiert huet. Den Ir Craig Breen koum mat engem Retard vu knapp annerhallwer Minutt op déi drëtte Plaz.

De Belsch Thierry Neuville huet säi Hyundai i20 op déi sechste Plaz gesteiert an hat e Réckstand vu 7 Minutten 42 Sekonnen op de Gewënner. Déi nächst Course ass fir de 24. Februar a Schweden programméiert.

Mam Grégoire Munster war och e Lëtzebuerger mat um Depart, dëst zesumme mat sengem belsche Copilot Louis Louka. Si sinn op der neister Generatioun vum Hyundai i20 N Rally2 gestart. Bis déi drëttlescht Special hat alles dono ausgesinn, dass um Enn eng Top10-Platzéierung géif eraussprangen, an déi 3. Plaz an der WRC2. Ma op WP15 huet sech de belsch-lëtzebuerger Duo e Platten agefaangen an domat iwwer 2 Minutte verluer. Domat si se op Plaz 5 an der WRC2-Wäertung zeréckgefall. Zwar konnte se nach Zäit guttmaachen op den zwou leschte Speciallen, mat et sollt net méi duergoen, fir zeréck op de Podium. Si ginn um Enn déi 12. am Generalklassement, déi 5. an der WRC2 an déi 3. an der WRC2-Junior-Wäertung. D'Enttäuschung war grouss op der Arrivée, ma alles an allem konnte si mat hirem Speed méi wéi zefridde sinn.

RTL