Eng weider dominant Victoire fir de Max Verstappen

An enger Course, an där wärend 50 Ronnen net all ze vill passéiert ass, konnt sech den aktuelle Weltmeeschter an der Schlussphas, an där et ugefaangen huet mat reenen, mat der besserer Strategie géint Aston Martin mam Fernando Alonso duerchsetzen. Red Bull huet domat bis ewell all Courssen an dëser nach jonker Saison gewonnen. Op de Plazen 3, 4 a 5 klasséiere sech den Esteban Ocon an déi béid Mercedes-Pilote Lewis Hamilton an George Russell.

Beim Start ass net all ze vill passéiert an d'Fuerer op de Plazen 1 bis 13 hunn alleguerten hir Plaz no den éischte 5 Ronne behalen. No 15 Ronne krut de bis dato op der 2. Plaz fuerende Fernando Alonso Problemer mat sengem rietsen hënneschte Pneu an huet lues a lues ëmmer méi Terrain op de Max Verstappen verluer. De Retard vum Spuenier op déi 1. Plaz huet sech dunn ëm déi 6 Sekonne stabiliséiert.

Un der Spëtzt huet de Max Verstappen d'Course virum Fernando Alonso an dem George Russell weider kontrolléiert.

Ronn 25 Ronne viru Schluss ass et du fir eng éischte Kéier an der Course hektesch ginn. Et huet ugefaange mat reenen an déi éischt Fuerer sinn op Intermediate Pneue gewiesselt. Aneschters de Fernando Alonso, dee sech komplett verspekuléiert huet, an um Ufank op Medium Pneue gewiesselt huet, fir eng Ronn méi spéit dann awer op Intermediate ze wiesselen. Doduerch ass dem Spuenier säi Réckstand op déi 1. Plaz op iwwer 20 Sekonne geklommen.

An der Schlussphas huet sech d'Course nees berouegt. De Red-Bull-Pilot an aktuelle Weltmeeschter Max Verstappen gewënnt domat seng 4. Course an dëser Saison. Fir de Fernando Alonso ass et déi 5. Podiumsplaz an der 6. Course a fir den Ocon ass et seng drëtte Podiumsplaz a senger Karriär.

Klickt hei, fir op de ganzen Dossier vun der Kinneksklass am Automobilsport ze kommen.

FORMULA 1 GRAND PRIX DE MONACO 2023

Resultat Monaco

D'WM-Wäertung

De Kalenner vun der Saison 2023

PDF: De Formel-1-Kalenner vun der Saison 2023