Den Hollänner op Red Bull huet och déi leschte Course zu Abu Dhabi gewonnen. De Podium gëtt komplettéiert vum Charles Leclerc an dem George Russell.

Beim Grand Prix vun Abu Dhabi ass et nieft der Victoire vun der leschter Course och nach ëm de Vizeweltmeeschtertitel bei de Konstrukteuren tëscht Mercedes a Ferrari gaangen. An hei ka sech um Enn Mercedes duerchsetzen.

De Max Verstappen kréint iwwerdeems seng Saison mat senger 19. Victoire an der 22. Course. Eng absolut Rekordsaison vum Hollänner. Op d'Plazen 2 an 3 fueren de Charles Leclerc an den George Russell. Hannendru klasséiere sech de Sergio Perez an de Lando Norris. De Sergio Perez ass u sech als Zweeten iwwert de wäisse Stréch gefuer, ass no enger 5-Sekonne-Strof awer op déi 4. Plaz zeréckgefall.

Déi ganz Course kënnt Dir Iech hei nach emol am Replay ukucken.

Resumé

De Charles Leclerc huet et an der 1. Ronn direkt e puer Mol versicht, de Max Verstappen ze attackéieren, de Weltmeeschter op Red Bull konnt d'Attacke vum Ferrari-Pilot awer all ofwieren, sou dass et op deenen éischte Plaze keng Ännerung nom Start gouf. Hannendrun hu sech béid McLaren-Piloten Oscar Piastri a Lando Norris erëmfonnt.

An der 5. Ronn huet de Lando Norris säin Teamkolleeg iwwerholl a war zu dësem Zäitpunkt neien Drëtten. 6 Ronne méi spéit huet den Australier no engem Fuerfeeler eng weider Plaz verluer - genotzt huet dëst den George Russell op Mercedes.

Alles an allem war déi leschte Course vun der Saison bei wäitem net esou spektakulär wéi nach déi lescht Woch zu Las Vegas. Un der Spëtzt louch no 30 Ronne weider de Max Verstappen, deen domat senger 19. Victoire an dëser Saison entgéint gefuer ass. De Carles Leclerc louch weiderhin op der 2. Plaz. Hannendru war et spannend ëm déi 3. Plaz. Do hunn George Russell, Lando Norros a Sergio Perez sech e flotte Kamp geliwwert. Am Mëttelfeld huet virun allem de Carlos Sainz sech schwéier gedoen, fir de Wee an d'Top 10 ze fannen.

Et sollt sech net méi all ze vill doen, sou dass de Max Verstappen och déi lescht Course vun der Saison gewënnt viru Leclerc an Russell.

Klickt hei, fir op de ganzen Dossier vun der Kinneksklass am Automobilsport ze kommen.

FORMULA 1 ETIHAD AIRWAYS ABU DHABI GRAND PRIX 2023

D'WM-Wäertung

De Kalenner vun der Saison 2023