Um Krounebierg zu Miersch goufen e Samschdeg déi nei Lëtzebuerger Champione gesicht. Bei der Dammen Elite huet d'Christine Majerus näischt ubrenne gelooss.

Häre-Championnat

An hei gouf et bei der Hären Elite eng Victoire fir de Lex Reichling. Den Coureur vum Tooltime Préizerdaul konnt sech virum Alzenger Scott Thiltges behaapten. Als 3. ass iwwerdeems den Téitenger Vincent Dias dos Santos iwwer d'Ligne d'Arrivée gefuer.

De Lex Reichling um RTL-Mikro no der Course

De Lex Reichling hat an der Mëtt vun der Course déi decisiv Attack gesat. Hien ass sech du séier eng Avance vu gutt 20 Sekonnen erausgefuer an huet dës vun Tour zu Tour ëmmer weider ausgebaut, fir sech d'Victoire mat enger Avance vun iwwer 1 Minutt souverän ze sécheren. Et ass den 1. Championstitel fir hien an och deen 1. bei der Elite fir säi Veräin den Tooltime Préizerdaul.

No der Course huet de Scott Thiltges op eng ganz schwiereg Course zeréckgekuckt an déi staark Leeschtung vum Lex Reichling gewierdegt.

De Scott Thiltges gouf de Vize-Champion

De Loïc Bettendorf war bei den Espoirë ganz kloer dee Stäerksten. Op d'Plazen 2 an 3 koumen de Raphaël Kockelmann souwéi de Cédric Pries. De Pries war eréischt am leschten Tour nach laanscht de Félix Schreiber gefuer.

De Loïc Bettendorf um RTL-Mikro

© Roland Miny

Bei de Masters gouf et eng souverän Victoire fir den Tom Flammang. De Bartrenger huet sech vun Ufank un un d'Spëtzt gesat an huet do vun Tour zu Tour säi Virsprong op seng Konkurrente vergréissert. Um Enn ass hie mat engem Virsprong vun 1 Minutt an 39 Sekonnen virum Christian Weyland als Éischten iwwer d'Arrivée gefuer. Um Podium stoung nach de Serge Bertemes op 2 Minutten an 2 Sekonnen.

© Roland Miny

Bei den Debutante gouf et déi erwaarte kloer Victoire fir de Mathieu Kockelmann. Den Déifferdenger huet säin Titel vun zejoert domadder verdeedegt. Hien huet sech mat engem Virsprong vun 1 Minutt a 7 Sekonne virum David Lang behaapt. Drëtte gouf den Noa Berton op 1 Minutt a 50 Sekonnen.

© Roland Miny

No 5 Victoirë wärend der Saison huet de Mats Wenzel seng Saison mat der Victoire vum Championstitel bei de Juniore gekréint. Den Atertdauler huet nom 2. vu 4 Tier d'Féierung an der Course iwwerholl an huet du bis zum Schluss säi grousse Konkurrent den Arno Wallenborn op Distanz gehalen, fir sech um Enn mat engem Virsprong vun 49 Sekonnen duerchzesetzen. Den Noé Ury ass deen Drëtte ginn.

© Roland Miny

Hie konnt sech am zweetleschten Tour vum Alexandre Kess ofsetzen. Pech hat den Tom Paquet. Hien huet och zu de Favoritte gezielt, ma duerch Problemer mat de Schong ass hien direkt am 1. Tour zeréckgefall an hat keng Chance méi op de Podium.

© Roland Miny

Damme-Championnat

Iwwerdeems gouf et bei den Damme mat der Victoire vum Christine Majerus keng Iwwerraschung. Fir d'11. Kéier noeneen huet si de Championstitel am Cyclocross gewonnen. Am déiwe Bulli zu Miersch ass d‘Coureuse vu Boels Dolmans eng konzentréiert a gläichméisseg Course gefuer. Mat groussem Virsprong huet si virum Elise Maes an dem Pia Wiltgen gewonnen.

D'Reaktioun vum Christine Majerus

Bei de Juniorinne war d‘Marie Schreiber déi Bescht, bei den Espoir-Dammen d‘Nina Berton.

Bei den Debutant Meedercher war et bis zum Schluss ganz spannend. Op de leschte Meter konnt sech d'Liv Wenzel virun hirer Clubkomerodin Anouk Schmitz den Titel sécheren. D'Layla Barthels huet de Podium completéiert.

© Roland Miny

Titele fir Kockelmann, Wenzel a Majerus
Beim Cyclocross-Championnat zu Miersch goufen och Titele bei den Debutanten, Masters, Junioren an Damme gesicht. Hei ee Resumé.

Andréck vum Cyclocross um Krounebierg zu Miersch

Weider Fotoe fannt Dir op pressphoto.lu.

Resultater am Iwwerbléck

Hären Elite:

  1. Lex Reichling (VV Tooltime Préizerdaul)
  2. Scott Thiltges (LG Alzéng)
  3. Vincent Dias dos Santos (LC Téiteng)
Espoiren:

  1. Loïc Bettendorf (Leopard)
  2. Raphaël Kockelmann (CCI Déifferdeng)
  3. Cédric Pries (VC Schengen)

Masters:

  1. Tom Flammang (LG Bartreng)
  2. Christian Weyland (CC Monnerech)
  3. Serge Bertemes (HIR Schëtter)

Debutanten:

  1. Mathieu Kockelmann (CCI Déifferdeng)
  2. David Lang (CT Atertdaul)
  3. Noa Berton (CT Atertdaul)

Junioren:

  1. Mats Wenzel (CT Atertdaul)
  2. Arno Wallenborn (LP Schëffleng)
  3. Noé Ury (CT Atertdaul)
Dammen Elite:
  1. Christine Majerus (Boels Dolmans)
  2. Elise Maes (Torelli Assure)
  3. Pia Wiltgen (SAF Zéisseng)
Debutant Meedercher: 

  1. Liv Wenzel (CT Atertdaul)
  2. Anouk Schmitz (CT Atertdaul)
  3. Layla Barthels (LP Schëffleng)

Organiséiert goufen déi national Meeschterschafte vun der UC Dippech.