E Sonndeg ass am Kader vum Skoda Cross Cup zu Zéisseng de regionale Cyclocross gefuer ginn.

Den Ufank vun den Elite-Courssen zu Zéisseng hunn d'Damme gemaach. No der Victoire de leschte Weekend um Härebierg war d’Christine Majerus nees net ze schloen. Vum Depart aus huet d'Cyclistin vun SD Worx dann och der Course hire Stempel opgedréckt. No engem ganz séieren Ufank ass d’Lach op d’Konkurrenz ëmmer méi grouss ginn. An déi Avance sollt dann och duergoen, fir déi zweet Victoire an dëser Saison kënnen ze féieren. Op d'Plazen 2 an 3 fueren d'Isabelle Klein an d'Maïté Barthels.

Bei den Hären hu sech no manner wéi 3 Ronnen déi zwee Kolleege Loïc Bettendorff a Mats Wenzel aus dem Stëbs gemaach. Den Noa Berton huet et nach eng Zäit laang gepackt, de Kontakt zu deenen zwee ze halen, huet awer no hallwer Course d'Spëtzt missen zéie loossen. Et huet laang Zäit dono ausgesinn, wéi wann dës Epreuve zu Zéisseng sech am Sprint wäert entscheeden. 2 Ronne viru Schluss sollt e Platten dem Mats Wenzel dann awer e Stréch duerch d’Rechnung maachen.

De Virsprong vum Loïc Bettendorff ass séier op 30 Sekonne geklommen an no zwou zweete Plazen de leschte Weekend duerft de jonke Coureur dann um Sonndeg seng drëtt Victoire an der lafender Saison feieren. Op de Plazen 2 an 3 klasséiere sech de Mats Wenzel an den Noa Berton.

De Ken Conter placéiert sech als gudde Véierten a bleift sou weiderhin am Leader-Trickot vum Skoda Cross Cup.

Bei de Juniore ka sech de Jules Huber virum Sawson Fehlen Pereira an dem Yannis Molter duerchsetzen. Bei den Damme gëtt et hei e Succès vum June Nothum. Kylie Bintz fiert virum Melissa Molnar op déi 2. Plaz.
A bei de Masters ka sech den Olivier Paderhuber iwwert déi 1. Plaz freeën. Hannendrun klasséiere sech de Marc Rolf Indegand an den Dirk Hemmerling.