E Freideg schonn hat Walfer de Champion Gréngewald mat 73:51 geklappt an den T71 Diddeleng hat de Basket Esch geklappt.

Um Samschdeg war et zu Steesel d'Suite vum 2. Spilldag vum Titelgrupp. Hei konnte sech d'Damme vun der Ettelbrécker Etzella um Enn knapp mat 90:84 géint d'Lokalekipp duerchsetzen.

Um Freideg stoungen ewell zwou Partië vum 2. Spilldag am Titelgrupp um Programm. An der Spëtzepartie stounge sech de Champion Gréngewald an d'Résidence Walfer géigeniwwer. Um Enn gouf et eng kloer Victoire fir Walfer. Si hu sech mat 73:51 behaapt a stinn elo un der Spëtzt vun der Tabell, dat Punktgläich mam Champion. An der zweeter Partie vum Owend huet den T71 Diddeleng de Basket Esch mat 78:67 geklappt.

Steesel - Etzella Ettelbréck 84:90

D'Gäscht konnt sech fréi an der Partie eng Avance erausspillen a konnte virun allem offensiv iwwerzeegen. No den éischten 10 Minutte louchen déi Ettelbrécker Dammen ewell mat 34:13 a Féierung. Déi Steeseler konnt sech bis d'Paus nach eng Kéier fänken, ouni der Etzella allerdéngs geféierlech méi no ze kommen. An der Paus stoung et also relativ kloer 36:54 aus Sicht vun der Lokalformatioun.

Am drëtte Véierel huet sech d'Steesel net opginn, si ware beméit, de Réckstand ze verréngeren, ma d'Etzella huet och op hirer Säit weider markéiert, a sou gounge si och mat enger 17-Punkten-Avance an de leschte Véierel.

Trotz dëser relativ komfortabeler Avance ass et der Etzella am leschte Véierel awer net gelongen, Rou an de Match ze bréngen. Ugefouert vum Leah Alexandria Scott a vum Erica Morrow, déi alle béid méi ewéi 30 Punkte markéiert hunn, konnt Steesel de Réckstand Stéck fir Stéck verklengeren, esou dass et an de leschte Minutten nach ee ganz enke Match gouf. D'Etzella konnt hir Avance awer iwwert d'Zäit retten, a sech um Enn mat 90:84 zu Steesel duerchsetzen.

Gréngewald - Résidence Walfer 51:73

D'Gäscht waren direkt vill besser an de Match an haten sech an den éischten 10 Minutte schonn e Virsprong vu 15 Punkten erausgespillt. Bis d'Paus konnt de Gréngewald de Réckstand nëmme minimal verkierzen, sou datt Walfer mat 42:28 a Féierung loung. Am drëtte Véierel huet d'Ekipp vum Amadeo Dias de Virsprong weider ausgebaut an esou ass et beim Tëschestand vun 62:39 an déi lescht 10 Minutte gaangen. D'Résidence huet sech d'Victoire do net méi huele gelooss an huet sech um Enn verdéngt mat 73:51 duerchgesat.

T71 Diddeleng - Basket Esch 78:67

Victoire fir den T71 am Damme-Basket
Déi Diddelengerinnen hu sech am Titelgrupp mat 78:67 géint de Basket Esch duerchgesat.

No engem ausgeglachenen éischte Véierel (12:13) huet den T71 Diddeleng sech bis d'Paus ee Virsprong vun 12 Punkten erausgespillt. Beim Tëschestand vu 35:23 ass et an déi zweet Hallschent gaangen. Hei war dunn de Basket Esch déi besser Ekipp a konnt de Réckstand bis op 2 Punkt verkierzen, sou datt et mat 48:50 aus Siicht vun de Gäscht an déi lescht 10 Minutte gaangen ass. Déi Diddelengerinnen hunn hei nach eng Kéier opgedréint a sech dëse Véierel geséchert, fir de Match um Enn mat 78:67 ze gewannen.