E Sonndeg den Owend huet d'Lëtzebuerger Basketfederatioun matgedeelt, datt een déi aktuell Saison géing fréizäiteg ofbriechen.

Wat d'Bewäertung vun der Saison 2019/2020 betrëfft, wëllt sech d'Basketfederatioun mat de Veräiner zesummesetzen, fir eng Léisung ze fannen.

Onkloer ass mam Ofbroch nämlech wéi et mam Op- an Ofstig ausgesäit.

De Franky Hippert huet bei der FLBB nogefrot, firwat een déi Mesure elo schonn annoncéiert huet.

Basket-Saison ass eriwwer/Reportage Franky Hippert

Sou wéi quasi all Mënsch e Sonndeg den Owend hei am Land hunn och déi Responsabel vun der Lëtzebuerger Basketballfederatioun d'Pressekonferenz vum Premier a vun der Gesondheetsministesch gekuckt.

"An do koumen direkt Reaktioune vun eisem Conseil, datt mer jo net kënne spillen, wann d'Halen zou sinn a vill schlëmmer kënne mer emol net trainéieren. Do hu mer gesot, da loosse mer dat elo emol sinn.", esou den Henri Pleimling, de President vun der FLBB.

An e puer Woche misst d'Situatioun sech jo awer nees normaliséiert hunn. Da kéint een dëst jo lo als eng Zort Fréijoerspaus gesinn an dann duerno d'Basketballsaison hei am Land bis an d'fréi Summerméint kënne fäerdeg spillen:

"Basket ass elo net onbedéngt eng Summersportaart. Mir hunn am Mëtt Mee schonn heiansdo Finalle gespillt, wou 25 Grad dobaussen waren, wou et der da 45 an der Hal waren. Fir bis an de Juni Basket an enger Hal ze spillen, schéngt eis onrealistesch. Eise Kalenner hält de 15. Mee offiziell op. Donieft hu sech d'Spiller no enger laanger Saison, déi jo och schonn nees Mëtt August ufänkt, schonn aner Saachen an de Kalenner opgeschriwwen. Fir méi wäit am Kalenner spillen ze goen, schéngt fir eis an engem Amateurkader, bis op zwee Spiller, keng Optioun fir seriö ze plangen, ze sinn. Fir eis schéngt dat onméiglech elo d'Leit wärend Wochen ouni Aktivitéit hei ze halen, an dann nees unzefänke mat spillen."

Wéi geet et weider am Basket?/Reportage Franky Hippert

Wie gëtt Champion, wie gewënnt d'Coupe, wie steigt op, wie fält eraus an esou weider. Alles dat ass am Moment ongewëss. E Sonndeg am Communiqué stoung nach, datt de Verwaltungsrot vun der FLBB, soubal d'Situatioun sech berouegt hätt, sech mat de Veräiner géif zesummesetzen, fir dat ze kucken. Fir d'éischt kënnt awer elo emol den CA beieneen, esou de President vun der Lëtzebuerger Basketballfederatioun Henri Pleimling: "Fir d'éischt kucke mir dat intern. Mir préiwen dat lo mol ganz à l'aise an och dat ass eng Ursaach, firwat mir gesot hunn, elo hale mer op, fir dat ouni Drock ze kucken, fir gemittlech an a Rou d'Situatioun an den Divisiounen ze klären, wat ass de Stand, wat ass gespillt, wien huet d'Kompetenz fir dat ze klären. An da kucke mer, jee no Situatioun, gëtt awer vläicht nach deen een oder anere Match gespillt."

Wat Zäitschinn am Dossier vun der Bewäertung vun der Saison ugeet, wëll een elo bei der FLBB ee Schratt nom anere goen.

"Mir gesinn eis muer am Conseil an da kucke mer, ob mer iwwerhaapt esou wäit kommen, datt mer d'Veräiner beieneeruffen oder net. Et ginn och Stëmmen, déi soen, de Conseil ass do, fir esou Decisiounen ze huelen. Wa mir och där Meenung sinn, da maache mer dat.", esou nach den FLBB-President.

Et war elo schonn eng kokass Situatioun am Lëtzebuerger Basketball. Kuerz nodeems den amerikanesche President Donald Trump annoncéiert hat, datt hien d'Grenze vun den USA géif zoumaachen, sinn eng Rei Profispiller aus de States, déi zu Lëtzebuerg engagéiert waren, heemgaangen, respektiv fir et e bëssen iwwerspëtzt auszedrécken, heem geflücht. No der Diskussioun, mat wéi vill Amerikaner am Lëtzebuerger Basket soll gespillt ginn, wär et jo och interessant gewiescht ze gesinn, wéi de Championnat ausgaange wär, wa just nach d'Spiller aus dem Grand-Duché um Terrain gestanen hätten.

Schreiwes vun der Federatioun

Deutsche Version:
Die Basketballsaison 2019/2020 ist beendet. Diese Entscheidung wurde aufgrund der neusten Entwicklungen betreffend des “Covid – 19“-Virus getroffen.
Die Clubs können demnach nun entscheiden, wie sie die Situation mit ihren Trainern und (Profi)-SpielerInnen lösen.

Was die Bewertung der Saison 2019/2020 betrifft, wird sich der Basketballverband, sobald sich die Situation beruhigt hat, mit den Clubs zusammensetzen, um über mögliche Bewertungen (Auf- und Abstieg, …) zu reden.

English version:
The 2019/2020 basketball season is over. This decision has been taken due to the latest developments concerning the « Covid – 19 » virus.
The clubs can now decide how to solve the situation with their coaches and (professional) players.
As far as the evaluation of the 2019/2020 season is concerned, once the situation has calmed down, the Basketball Federation will meet with the clubs to discuss possible evaluations (promotion and relegation, …).

Version française
La saison de basket 2019/2020 est terminée. Cette décision a été prise en raison des derniers développements concernant le virus « Covid – 19 ».
Les clubs peuvent maintenant décider de la manière de résoudre la situation avec leurs entraîneurs et leurs joueurs (professionnels).
En ce qui concerne l’évaluation de la saison 2019/2020, lorsque la situation se sera calmée, la Fédération de basket-ball rencontrera les clubs pour discuter d’éventuelles évaluations (promotion et relégation, …).