Déi Decisioun hu béid Veräiner der FLBB an engem Schreiwes matgedeelt. D'Clibb hu sech enttäuscht gewisen, net an d'Decisioun matagebonne ginn ze sinn.

D'Onzefriddenheet bei enger ganzer Rei Veräiner aus dem Lëtzebuerger Basketball war an de leschten zwee Deeg, nodeems d'Federatioun en Donneschdeg matgedeelt hat, wéi d'Saison gewäert géif ginn, grouss. E Samschdeg koum du jo och d'Matdeelung vun de Musel Pikes an der Etzella, datt si d'Coupe-Finall beim Season Opening zu Keel, sou wéi vun der FLBB proposéiert, net géife spillen.

Basket, Coupe-Finall/Reportage Franky Hippert

Fir de Pit Nilles, Comitésmember vun de Pikes, ginn et e puer Grënn fir hir Decisioun. Ee Grond ass, datt d'concernéiert Veräiner net mat agebonne waren: "Dat hate mer der Federatioun jo och schrëftlech matgedeelt, datt mir och gär géife matschwätzen, wann déi Coupe soll gespillt ginn, fir eng gemeinsam Léisung ze fannen, dat ass awer net geschitt. Ech fannen et jo och éierenhaft, wann d'Federatioun eppes fir de Club vu Keel wëll maachen."

Fir de Pit Nilles gëtt et awer och nach eng aner Ursaach, firwat een déi sougenannte Coupe-Finall net am Ufank vun der nächster Saison wëll spillen:

"Déi Coupefinall ass ëmmer den Héichpunkt vun der Saison, lo ass d'Loft do eraus. An am September ginn et aner Viraussetzungen, Transferten, aner Spiller, aner Amerikaner a sou weider."

No der Annonce vun der FLBB, datt d'Saison wéinst dem Coronavirus eriwwer wär, mat där Decisioun konnten déi meescht Veräiner liewen, hat ee bei der Etzella och mat allem fir des Spillzäit ofgeschloss. Virun allem verstinn déi Ettelbrécker awer och net, firwat d'Federatioun elo bei der Fro, wéi et soll weidergoen, net op d'Clibb duergaangen ass, esou den Teammanager vun der Etzella Jemp Gutenkauf: "Firwat d'FLBB dës Decisioun geholl huet, wësse mer net. D'FLBB huet an hire Communiquéen ëmmer ënnerstrach, datt d'Zukunft mat der Veräiner géif beschwat ginn."

Et rumouert also ferm an der Lëtzebuerger Basketfederatioun.

Eisen Informatiounen no bléist de raue Wand souguer och am CA vun der FLBB.

D'Meenungen am Verwaltungsrot vun der Basketfederatioun iwwert d'Aart a Weis, wéi d'Decisiounen aus de leschten Deeg getraff goufen, ginn däitlech auserneen a sinn net onëmstridden. De President vun der Federatioun Henri Pleimling sot eis, datt een elo mol all Reaktioune vun de leschten Deeg zu Kenntnis géif huelen, dann analyséieren, an dann e Méindeg am nächste CA nach emol driwwer schwätze géif.

De Frederic Gutenkauf vun der Etzella
Den Ettelbrécker Kapitän iwwer d'Coupe-Finall.
De Pit Nilles vun de Musel Pikes
De Pit Nilles schwätzt iwwer d'Coupe-Finall.