A Schweden war et um Méindeg den 2:2 tëscht dem Lars Gerson senger Ekipp Norrköping an AIK.

Sonndeg

Um Sonndeg den Owend stoung an der Belsch d'Partie tëscht Trudien a Léck um Programm. De Laurent Jans stoung bei de Gäscht 90 Minutten um Terrain. Léck verléiert de Match awer mat 0:2.

Den Anthony Moris stoung bei der 6:0-Victoire vu Royale Union St. Gilloise géint Bruges 2 am Gol vun de Gäscht an huet domat säi Gol déi 90 Minutte propper gehalen. St. Gilloise steet an der 2. Liga an der Belsch op der 1. Plaz.

A Griicheland stoung beim Match Asteras Tripolis géint Kreta mam Lëtzebuerger Vahid Selimovic och en FLF-Acteur um Feld vun de Gäscht. De Vahid Selimovic krut bei der 0:1-Néierlag vu senger Ekipp Kreta fir d'éischt an der 70 Minutt déi giel Kaart. Nëmme 7 Minutten dorops misst den Arbitter dem Lëtzebuerger dunn déi giel-rout Kaart weisen. Domat war dem Vahid Selimovic säin Aarbechtsdag eriwwer.

Sparta Rotterdam huet an der 1. hollännescher Liga mam Mica Pinto 1:1-Gläich géint Heracles gespillt. De Lëtzebuerger Nationalspiller stoung déi 90 Minutten iwwer um Terrain fir d'Lokalekipp.

De Maurice Deville stoung bei der 1:2-Defaite vu Saarbrécken géint Verl an der 3. Liga an Däitschland net am Kader vun der Lokalekipp. Verl ass no der Victoire punktgläich mat Saarbrécken. Saarbrécken läit op der 2. Plaz, Verl op der 3., Saarbrécken huet awer 1 Match manner gespillt.

De Sebastien Thill souz beim 0:0 vu senger Ekipp Tambow géint Ural Jekaterinburg an der 1. Russescher Liga 90 Minutten iwwer op der Bänk.

An der Nuecht op e Sonndeg huet New York City ouni de Maxime Chanot mat 3:1 géint Montreal Impact gewonnen. An der Eastern Conference steet New York no 20 Spilldeeg op der 5. Tabelleplaz.

Samschdeg

Um spéide Samschdeg Owend huet Gil Vicente mat 1:0 géint de FC Porto verluer. De Tim Hall stoung bei Gil Vicente net am Kader. De Gol fir Porto huet an der 30. Minutt de Evanilson geschoss.

An der Ukrain huet Dynamo Kiew mat 1:0 géint Oleksandrya gewonnen. Den Gerson Rodrigues ass mat enger gieler Kaart an der Paus ausgewiesselt ginn. No 7 Matcher steet Dynamo Kiew elo mat 17 Punkten op der éischter Plaz an der Tabell. Méi spéit huet sech den Enes Mahmutovic dann nach mam FC Lwiw mat 1:3 géint Dnipro-1 misse geschloe ginn.

Den 1. FC Kaiserslautern huet an der 3. däitscher Liga mat 2:3 géint den SV Meppen de Kierzere gezunn. D'Ekipp vum Jeff Saibene steet domat weiderhin op enger Ofstigsplaz.

An der héchster portugisescher Liga ass et fir de CD Nacional en 1:1-Remis géint Ferreira ginn. De Vincent Thill gouf dobäi an der Paus ausgewiesselt.

An der Bundesliga huet Mainz mam Leandro Barreiro eng 2:1-Féierung verspillt an zum Schluss nach mat 2:3 géint Gladbach verluer. De Lëtzebuerger ass an der 65. Minutt agewiesselt ginn. Mainz muss also weiderhin op den éischte Punkt dës Saison waarden.