An der Bundesliga huet Mainz 3:1 zu Freiburg gewonnen. An der englescher Premier League huet sech de Champion mat 3:0 behaapt an ass elo Tabellenzweeten.

Nodeems um Samschdeg de Groussdeel vum 8. Spilldag an der däitscher Bundesliga war, war et um Sonndeg ënnert anerem Mainz mam Leandro Barreiro, déi hir éischte Victoire vun der Saison feiere konnten.

An England koum et iwwerdeems zum Duell tëscht Liverpool a Leicester, déi alle béid dräi Punkten afuere wollten. Um Enn gouf et eng verdéngte Victoire fir d'Ekipp vum Jürgen Klopp.

Bundesliga

Freiburg - Mainz 1:3
0:1, 0:2, 0:3 Mateta (2', 34', 40'), 1:3 Petersen (63')

Nodeems Mainz no den éischte 7 Spilldeeg bis ewell eréischt ee Punkt hat, sollt et um 8. Spilldag déi éischte Victoire fir den Tabelleleschte ginn. No nëmmen 2 Minutte konnt de Mateta d'Féierung markéieren, dëst no enger Pass an de Laf vum Leandro Barreiro, deen an der éischter Eelef stoung. Freiburg hat Mainz ëmmer erëm ze vill Plaz am Mëttelfeld ginn, an esou konnt de Mateta nach virun der Paus zwee Mol markéieren, esou dass Mainz duerch een "Hattrick" vum franséische Stiermer mat 3:0 a Féierung louch.
Nom Säitewiessel konnt de Petersen just nach den Uschloss markéieren a sou konnt Mainz déi éischt, wichteg Victoire feieren, dëst ënnert anerem och duerch eng Virlag vum Leandro Barreiro, deen an der Nospillzäit ausgewiesselt gouf.

Köln - Union Berlin 1:2
0:1 Awoniyi (27'), 1:1 Skhiri (36'), 1:2 Kruse (72')

Köln steet no der 1:2-Defaite géint Union Berlin an der Victoire vu Mainz op enger Ofstigsplaz. Nodeems sech béid Formatiounen an den éischte Minutte schwéier gedoe hunn, fir sech Geleeënheeten erauszespillen, war et an der 27. Spillminutt den Awoniyi, deen d'Gäscht a Féierung brénge konnt. D'Defense vu Köln war net energesch un de Stiermer vu Berlin erugaangen an esou konnt dësen de Ball am Filet ënnerbréngen. Köln hat allerdéngs och seng Chancen a genau esou eng konnt de Skhiri no 36. Minutte notzen. No enger Flank vum Duda stoung de Skhiri goldrichteg a konnt de Ball mam Kapp am Filet ënnerbréngen. D'Berliner sollten déi dräi Punkten um Enn awer mat heem huelen. No engem Feeler vum Özcan um Ingvartsen gouf et Eelefmeter. Dëse konnte de Kruse nach net verwandelen, beim Noschoss hat den Horn dann allerdéngs keng Chance méi.

Premier League

Liverpool - Leicester 3:0
1:0 Evans (21', Selbstgol), 2:0 Jota (41'), 3:0 Firmino (86')

Liverpool huet sech e Sonndeg den Owend géint Leicester d'Victoire geséchert an domadder Geschicht geschriwwen. De Veräin ass elo zanter 64 Premier-Leauge-Matcher virun den eegene Spectateuren ongeschloen. Den ale Rekord louch bei 63 Matcher, dëse Rekord hat de legendäre Bob Paisley mat senger Ekipp tëscht 1978 an 1981 realiséiert.

Déi Liverpooler, déi op de Kapitän Henderson, den Alexander-Arnold, de Gomez an de Salah hu misse verzichten, hu vun Ufank un d'Fiedem an d'Hand geholl. D'Ekipp vum Jürgen Klopp konnt sech an den éischte 17 Minutte dann och scho fënnef Golchancen erausspillen. D'Gäscht dogéint stoungen déif an hunn op Kontere gewaart.

An der 21. Minutt huet et dunn eng éischte Kéier gerabbelt. No engem Corner vu riets, war den Evans am Strofraum esou mam Mané beschäftegt, datt hie vum Ball iwwerrascht gouf an dat ronnt Lieder mam Kapp an den eegene Filet gesat huet. Och wa Liverpool de Gol net selwer geschoss huet, war et eng verdéngte Féierung.

Kuerz virun der Paus hunn d'Reds op 2:0 erhéicht. No engem staarke Säitewiessel vum Jones huet sech de Robertson op der lénker Säit duerchgesat an dunn eng staark Flank op den éischte Potto gespillt. De Jota huet sech do an d'Luucht geschrauft an dem Schmeichel mam Kapp keng Chance gelooss.

No der Paus huet den englesche Champion de Match weider bestëmmt an huet sech eng ganz Partie geféierlech Chancen erausgespillt. De Ball wollt awer laang net méi iwwert d'Linn goen. Ënnert anerem war de Potto e puer Mol am Wee an och de Schmeichel huet e puer staark Aktioune gewisen. An der 86. Minutt huet et awer nach eng Kéier am Gol vu Leicester gerabbelt. De Firmino huet de Ball verwandelt a mam 3:0 fir d'Schlussresultat gesuergt.

An der Tabell steet Liverpool duerch dës verdénge Victoire op der zweeter Plaz, dat punktgläich mat Tottenham. Leicester steet elo op der 4. Plaz.

Serie A

Inter Mailand - FC Turin 4:2
0:1 Zaza (45+2'), 0:2 Ansaldi (62'), 1:2 Sanchez (64'), 2:2 Lukaku (67'), 3:2 Lukaku (84'), 4:2 Martinez (90')

Inter Mailand goung als Favorit an d'Partie géint den FC Turin, déi virun der Partie op der 18. Plaz an der Tabell stoungen an ëm de Maintien kämpfen.

Kuerz virun der Paus konnt de Zaza d'Turiner dann iwwerraschend a Féierung bréngen, éiert den Ansaldi no gutt enger Stonn souguer op 2:0 erhéije konnt. Duerno koumen d'Männer aus der italienescher Haaptstad besser an de Match an de Sanchez konnt an der 64. Minutt verkierzen. Nëmmen 3 Minutte méi spéit konnt de Lukaku den Ausgläich markéieren, éiert de belsche Stiermer no engem Feeler vun Turin am eegene Strofraum aus 11 Meter fir d'Féierung gesuergt hat. An der 90. Minutt konnt de Martinez fir de Schlusspunkt suergen an Inter Mailand soumat 3 schwéier erkämpfte Punkte sécheren.

Neapel - AC Mailand 1:3
0:1 Ibrahimovic (20'), 0:2 Ibrahimovic (54'), 1:1 Mertens (63'), 1:3 Hauge (90+5')

Ligue 1

Nantes - Metz 1:1
1:0 Kolo (29'), 1:1 Leya (45+4')

A Frankräich war Metz, den eemolege Veräin vum Laurent Jans, op Besuch bei Nantes. Nantes war vun Ufank u ganz vill a Ballbesëtz a wollt Metz net an de Match komme loossen. No knapp enger hallwer Stonn konnte si dann och verdéngt a Féierung goen, dëst duerch ee stramme Schoss vum Kolo aus ronn 16 Meter. Metz huet sech iwwer wäit Strecken op Kontere verlooss, an hat an der Nospillzäit vun der éischter Hallschent d'Chance, fir op Eelefmeter ze markéieren. De Leya hat sech dës Geleeënheet net huele gelooss a konnt ausgläichen. An der zweeter Hallschent war Nantes beméit, fir d'Féierung ze markéieren, ma Metz hat awer näischt méi zougelooss.

Den detailléierte Resumé vum Match fannt Dir bei de Kolleege vum 5minutes.

Lille - Lorient (4:0)
1:0 Yazici (29'), 2:0 Xeka (37'), 3:3 Yazici (51'), 4:0 Luiz Araujo (57')

La Liga

Cadiz - Real Sociedad 0:1
0:1 Isak (66')

Déi grouss Iwwerraschung aus Spuenien ass aktuell Real Sociedad. No der 1:0-Victoire iwwer Cadiz sti si no 10 Spilldeeg iwwerraschend un der Spëtzt vum Championnat. De Gol vum Dag konnt de fréieren Dortmunder Alexander Isak no 66 Minutte markéieren. D'Ekipp aus dem Norde vu Spuenien huet domat 3 Punkten Avance op Atlético Madrid, déi allerdéngs nach 2 Matcher manner um Kont hunn.