Déi argentinesch Futtball-Legend Diego Armando Maradona ass e Mëttwoch am Alter vu 60 Joer gestuerwen.

Nodeems argentinesch Medien den Doud vum Futtballweltmeeschter vun 1986 gemellt haten, huet den argentinesche Futtballverband e Mëttwoch den Owend d'Noriicht bestätegt.

Wéi e Spriecher matgedeelt huet, ass de Maradona keng véier Wochen no sengem 60. Gebuertsdag zu Buenos Aires un engem Häerzinfarkt gestuerwen.

Kuerz no der Nouvelle vum Doud huet d'Regierung an Argentinien eng Staatstrauer vun dräi Deeg decidéiert.

Zanter Joren huet den Diego Maradona schonn ënner gesondheetleche Problemer gelidden. Eréischt Ufank November war hie wéinst enger Gehierbluddung operéiert ginn. An der Vergaangenheet hat hien ënnert anerem 2 Häerzinfarkter, hat sech mat Hepatite infizéiert an hat sech duerch säin Iwwergewiicht e Bypass am Mo setze gelooss. Donieft war hie schonn e puer Mol wéinst senger Drogesucht a Behandlung.

© AFP

RIP Diego Maradona / Reportage Jeff Kettenmeyer

"Die Hand Gottes" wéi de Maradona zanter der WM-Véierelsfinall 1986 géint England genannt gouf, war eng Mëschung aus Genie a Wansinn.

Sportlech gesinn zielt hien zu deene beschte Futtballspiller vun allen Zäiten. No sengem Championstitel mat de Boca Juniors huet den Argentinier 1982 de Wee an Europa fonnt an huet beim FC Barcelona ënnerschriwwen. Seng beschte Joren hat hien an Italien zu Neapel.
Fir d'Neapolitaner huet hien an 188 Matcher 81 Goler geschoss. Gouf zweemol italienesche Champion an huet 1989 den UEFA Cup gewonnen. Mat Argentinien gouf hien 1986 als Kapitän Weltmeeschter.

An de 90er Jore gouf hien zweemol vun der Fifa wéinst Drogen- an Dopping-Problemer gespaart.
Och no senger aktiver Karriär stoung de Maradona ëmmer nees wéinst Skandaler oder gesondheetlech Problemer an de Medien.

Als Trainer konnt hien ni un den Erfolleg vu senger aktiver Zäit als Spiller uknäppen.

D'Doudelued mam Diego Maradona ass mëttlerweil am Presidentepalais zu Buenos Aires ukomm, fir do opgeboort ze ginn.
Honnerte Mënschen stoungen scho Schlaang, fir der Futtball-Legend eng leschte Kéier Äddi ze soen.