Köln kann no 18 Matcher ouni Victoire nees eng Kéier gewannen an dat ausgerechent zu Dortmund. Bayern klappt Stuttgart a Leipzig gewënnt géint Bielefeld.

Wat e Spilldag an der däitscher Bundesliga. Zu Dortmund huet Köln eng immens wichteg a gläichzäiteg iwwerraschend Victoire konnte feieren. Stuttgart huet de Bayern alles ofverlaangt, mee verléiert um Enn trotzdeem onglécklech. Union Berlin a Frankfurt hu fir e Spektakel gesuergt a Leipzig klappt Bielefeld. Augsburg a Freiburg deele sech d'Punkten. Gladbach huet géint e kämpferescht Schalke gewonnen.

9. Spilldag vun der Futtball-Bundesliga

Borussia Mönchengladbach - Schalke 04 4:1
1:0 Neuhaus (15'), 1:1 Raman (20'), 2:1 Wendt (36'), 3:1 Thuram (52'), 4:1 Wolf (80')

Schalke huet am Verglach zu deene leschte Matcher eng staark verbessert Leeschtung gewisen. Trotz allem war et d'Lokalekipp, déi duerch den Neuhaus a Féierung gaangen ass. D'Knappen hu sech awer net hänke gelooss an hu mam Raman duerch Viraarbecht vum staarken Uth den 1:1-Remis geschoss. Gladbach huet an de Schlussminutten den Tempo erhéischt a sinn duerch de Wendt an der 36. Minutt mat enger Féierung an d'Paus gaangen.

Nom Säitewiessel war Gladbach awer déi besser Ekipp a konnt de Score an der 52. Minutt net ganz onverdéngt duerch den Thuram op 3:1 erop schrauwen. No 80 Minutten huet de Wolf de 4:0 geschoss, an d'Bier war geschielt. An der Suite hunn d'Fohlen de Match kontrolléiert ofgespillt a gewannen no 90. Minutte mat 4:1. Schalke bleift deemno weiderhin ouni Victoire.

Borussia Dortmund - 1. FC Köln 1:2
0:1 Skhiri (9'), 0:2 Skhiri (60'), 1:2 Hazard (74')

De grousse Favorit BVB war wuel déi iwwerleeën Ekipp, bis op ee Schoss vum Sancho, deen um Aluminium hänke bliwwen ass, ass an der Offensiv awer net vill komm vun deene Schwaarz-Gielen. D'Gäscht hunn eng immens couragéiert Leeschtung gewisen an hu sech an der 9. Minutt no engem Corner duerch de Skhiri mam 1:0 belount. Dëst sollt och d'Resultat no 45 Minutte sinn.

Och an der 2. Hallschent huet Dortmund immens staark ugefaangen an hat duerch Can a Reus gutt Chancen, den Ausgläich ze markéieren. No enger Stonn war et awer net de BVB, mee et waren déi Kölner, déi de Ball an de Filet gesat hunn. Genee wéi beim éischte Gol huet no engem Corner de Skhiri den 2:0 markéiert. Dortmund huet an der Schlussphas alles no vir geworf a sech a Persoun vum Hazard an der 74. belount. Et sollt awer net méi duergoen, fir nach den Ausgläich ze markéieren. Eng grouss Iwwerraschung deemno zu Dortmund.

VfB Stuttgart - Bayern München 1:3
1:0 Coulibaly (20'), 1:1 Coman (38'), 1:2 Lewandowski (45+1'), 1:3 Douglas Costa (87')

Stuttgart huet vun Ufank un eng immens gutt Leeschtung gewisen an ass verdéngt mat 1:0 duerch de Coulibaly a Féierung gaangen. Och dono war de VfB geféierlech an hätt duerch de Förster an der 35. Minutt den 2:0 misse markéieren. De Stuttgarter huet de Ball awer knapps laanscht de Potto gesat. Nëmmen 1 Minutt méi spéit war et erëm de Förster, ma hien ass awer um Neuer am Gol vun de Bayern hänke bliwwen. Nom Ausgläich vum Coman an der 38. Minutt war et de Lewandowski, dee kuerz virun der Paus Bayern mat 2:1 a Féierung geschoss huet. 

De Favorit aus München huet an deenen zweete 45 Minutten eng wesentlech méi stabil Leeschtung gewisen a sou hat Stuttgart et schwéier, offensiv geféierlech virum Gol vum Neuer opzedauchen. D'Lokalekipp huet wuel alles probéiert, mee et sollt net duergoen, de Bayern e Been ze stellen. A sou huet den Douglas Costa an der 87. Minutt fir den d'3:1 Schlussresultat gesuergt.

Union Berlin - Eintracht Frankfurt 3:3
1:0 Andrich (2'), 2:0 Kruse (6'), 2:1 Silva (27'), 2:2 Silva (37'), 2:3 Dost (79'), 3:3 Kruse (82')

Wat eng geckeg 1. Hallschent an der aler Försterei. Mol no net 6 Minutte louch d'Lokalekipp duerch den Andrich an de Kruse scho mat 2:0 a Féierung. No 11. Minutten huet den Awoniyi bal den 3:0 geschoss, mee den Trapp konnt d'Frankfurter am Match behalen. No ronn 20 Minutten hunn d'Gäscht sech gefaange krut an hunn a Persoun vum Silva gläich zwee Mol zougeschloen, sou dass et an der Paus 2:2-Gläich stoung.

Bis zur 79. Minutt ass an der 2. Hallschent net vill passéiert. Dunn awer ass de Bas Dost virum Gol vun Union opgedaucht an huet de Ball zur 3:2-Féierung an de Filet gesat. Laang sollt et awer net beim 3:2 fir Frankfurt bleiwen. De Kruse huet nëmmen 3 Minutte méi spéit mat engem fantastesche Schoss de Score op 3:3 gesat, bei deem et och bleiwe sollt. Wat e Match.

RB Leipzig - Arminia Bielefeld 2:1
1:0 Angelino (29'), 2:0 Nkunku (47'), 2:1 Klos (75')

FC Augsburg - SC Freiburg 1:1 
0:1 Grifo (64'), 1:1 Vargas (80')

Klickt hei, fir op d'Säit mat all de Resultater ze kommen.