De BVB huet géint Mainz mam Barreiro nëmmen 1:1 gespillt a Leipzig huet beim 2:2 géint Wolfsburg de Sprong op Plaz 1 verpasst.

Um Samschdeg war et an der däitscher Bundesliga no der 1:0-Victoire vun Union Berlin géint Leverkusen um Freideg d'Suite vum 16. Spilldag.

Ma och an de weidere Länner gouf et um Samschdeg Futtball, ënnert anerem waren Chelsea an de franséische Champion vu Paräis am Asaz.

16. Spilldag an der Bundesliga

Stuttgart 2:2 Gladbach
0:1 Stindl, Eelfmeter (35'), 1:1 Gonzalez (58'), 1:2 Zakaria (61'), 2:2 Wamangituka (90'+6)

Gladbach wollt sech mat enger Victoire weider op den europäesche Plaze stabiliséieren. No 34. Minutten hat et och gutt fir déi Gladbacher ausgesinn, dëst well de Lainer am Strofraum gefall ass an den Offiziellen op Eelefmeter entscheet huet. De Stindl huet sech dës Geleeënheet net huele gelooss an huet op 1:0 gesat. Stuttgart huet sengersäits de Kapp awer net hänke gelooss, a sou koume si nom Säitewiessel och erëm an de Match zréck.

Nodeems de Gonzalez eng Flank vum Sosa an der 58. Minutt am Filet ënnerbrénge konnt, war d'Freet fir Stuttgart awer net vu laanger Dauer. Nëmmen 3 Minutte méi spéit konnt den Zakaria déi éischte Geleeënheet fir d'Gäscht verwäerten, dëst mat engem prezise Schoss an de laangen Eck. Stuttgart huet et nom Réckstand nach eng Kéier probéiert, fir d'Resultat ze dréinen. An der Nospillzäit stoung dunn den Offiziellen op en Neits am Mëttelpunkt. De Kalajdzic war am Strofraum vum Bensebaini beréiert ginn. An éischter Instanz hat den Här Brych weider lafe gelooss, duerch de Videoassistent huet hien duerno dann awer op de Punkt gewisen. De Wamangituka huet sech dës Chance net huele gelooss a sou konnt hie Stuttgart an der leschter Minutt nach ee Punkt retten.

Dortmund 1:1 Mainz
0:1 Öztunali (57'), 1:1 Meunier (73')

Fir de Leandro Barreiro a seng Mainzer leeft et aktuell net no Plang an no der Victoire vu Schalke um leschte Spilldag stounge si virum Match mat just enger Victoire op der leschter Plaz. Fir d'Haushäre vun Dortmund goung et iwwerdeems ëm wichteg Punkte fir weider un der Spëtz mat drunzebleiwen.

De Favorit aus Dortmund hat dann och déi éischte Geleeënheet vum Match. No engem Pass vum Meunier op de Reus hat dësen no nëmmen 2 Minutten den Haaland fonnt, deen de Ball prezis laanscht den Zentner leeë konnt, ma duerch d'Agräife vum Videoassistent gouf de Gol um Enn wéinst engem Abseits zréckgeholl. D'Lokalekipp huet sech doduerch awer net beonrouege gelooss a war weider kloer den Här am Haus. Si konnte sech ëmmer erëm Chancen erausspillen, déi Beschten dovun an der 31. Minutt duerch ee Schoss widder de Potto vum Bellingham, Mainz huet sech op Kontere verlooss. E Gol sollt an den éischte 45 Minutten awer op kenger Säit falen.

Trotz der däitlecher Iwwerleeënheet vum BVB waren et déi Mainzer, déi no 57 Minutten a Féierung goe konnten. Den Öztunali hat de Ball mat engem super Schoss aus gutt 20 Meter an de Wénkel gesat. Den Tabelleleschte louch soumat iwwerraschend a Féierung.

D'Freet op Säite vu Mainz war awer net vu laanger Dauer. No engem Pass vum jonken Talent Moukoko war d'mainzer Defense net konzentréiert genuch, a sou konnt de Meunier aus 16 Meter mat engem stramme Schoss markéieren. D'Lokalekipp wollt direkt noleeën an no engem Feeler um Hack gouf et nëmmen eng Minutt méi spéit Eelefmeter fir déi Schwarz-Giel. De Reus huet d'Nerven allerdéngs net behalen an esou goung säi Versuch laanscht de Potto. Domat ka sech Mainz an de Barreiro iwwer ee wichtege Punkt ëm de Maintien freeën. Fir Borussia Dortmund ass d'Resultat e weidere Réckschlag an der Course ëm den Titel.

Wolfsburg 2:2 Leipzig
0:1 Mukiele (4'), 1:1 Weghorst (22'), 1:2 Steffen (35'), 2:2 Orban (54')

Leipzig war iwwerdeems zu Wolfsburg gefuerdert. D'Ekipp vum Julian Nagelsmann wollt sech mat enger Victoire op d'mannst bis e Sonndeg un d'Spëtzt vum Championnat setzen. Ma och d'Haushäre vu Wolfsburg spille bis ewell eng zolidd Saison an hu berechtegt Hoffnung op eng Plaz ënnert den Top 6.

Och hei huet déi éischt geféierlech Aktioun net laang op sech waarde gelooss. No engem Pass vum Forsberg stoung de Mukiele am Strofraum ze fräi an hat aus kuerzer Distanz keng Problemer méi, fir de Ball am Filet ënnerzebréngen. Domadder stoung et schonn no 4 Minutten 1:0 fir d'Lokalekipp. Wolfsburg huet sech nom fréie Géigegol awer net beandrockt gewisen a wollt direkt äntweren. De Weghorst konnt de Gulacsi an der 6. Minutt och iwwerwannen, allerdéngs war den Hollänner virdru mat der Hand um Ball.

An enger flotter Partie goung et weider hin an hier a béid Formatioune ware beméit, offensive Futtball ze spillen. D'Beméiunge vun de Wolfsburger gouf dann an der 22. Minutt belount. No enger Flank vum Gerhardt konnt sech de Weghorst an der Mëtt mam Kapp duerchsetzen an den Ausgläich markéieren. Dëse Gol sollt Wolfsburg gutt doen, si haten duerno liicht méi vum Match, och wa Leipzig weiderhi geféierlech blouf. No engem Ballverloscht vum Sabitzer konnt de Steffen aus gutt 16 Meter schéissen. Säi Versuch gouf nach vum Orban ofgefälscht, esou dass de Gulacsi keng Chance hat.

Nom Säitewiessel ass Leipzig mat vill Tempo aus der Kabinn komm. An der 54. Minutt gouf et e Fräistouss aus gudder Positioun, déi den agewiesselten Nkunku an de Strofraum bruecht huet. Wolfsburg krut de Ball net gekläert a sou konnt den Orban dat ronnt Lieder aus kuerzer Distanz iwwert d'Linn drécken. Leipzig war duerno déi méi beméiten Ekipp, ma um Enn sollt et awer beim 2:2-Remis bleiwen, domadder verpasst Leipzig de Sprong un d'Tabellespëtzt.

Hoffenheim 0:0 Bielefeld

Bremen 2:0 Augsburg
1:0 Gebre Selassie (84'), 2:0 Agu (87')

Köln 0:0 Hertha


Klickt hei, fir op d'Säit mat all de Resultater ze kommen.