Um leschte Spilldag an der Belsch ka Waasland-Beveren sech géint Leuven duerchsetzen. De Laurent Jans stoung net am Kader vu Léck.

Beim Optakt vun der Saison an den USA gouf et fir dem Maxime Chanot seng Ekipp New York City eng 1:2-Defaite géint DC United. De Lëtzebuerger stoung um 1. Spilldag an der MLS iwwer 90 Minutten um Terrain.

Um leschte Spilldag an der Belsch ka sech Waasland-Beveren mam Danel Sinani eng 2:1-Victoire géint Leuven sécheren. De Lëtzebuerger stoung déi 90 Minutten iwwer um Terrain a krut an der 25. Minutt eng Giel Kaart gewisen. Duerch dës Victoire an déi gläichzäiteg Defaite vu Mouscron, der Ekipp vum Lëtzebuerger Investor Gerard Lopez, géint Bruges, huet sech Waasland-Beveren nach op d'Relegatiounsplaz gerett. Béid Veräiner hunn um Enn gläich vill Punkten, ma Sinani a Co hu méi Victoirë gefeiert. Mouscron steigt domadder of a Waasland-Beveren kritt et am Relegatiounsmatch mat Seraing ze dinn.

De Laurent Jans stoung iwwerdeems bei der 3:0-Victoire vu Léck géint Beerschot net am Kader. De Standard steet um Enn op der 6. Plaz a spillt elo am Playoff ëm eng Plaz an der Conference League.

Iwwerdeems stoung de Marvin Martins an der 2. Liga a Portugal bei Casa Pia net am Kader. D'Ekipp vum Lëtzebuerger huet doheem eng kloer 0:3-Néierlag missen astiechen. An der 1. Liga stoung de Vincent Thill wéinst enger Spär net am Kader vun Nacional Funchal géint Porto. De Match huet Porto mat 1:0 gewonnen.

An der Schwäiz huet de Christopher Martins am Match vu de Young Boys Bern géint Lugano 90 Minutten iwwer op der Bänk misse Plaz huelen. Um Enn ka sech dem Lëtzebuerger seng Ekipp awer souverän mat 3:0 géint Lugano duerchsetzen. Domadder gewënnt Bern fir d'véierte Kéier noeneen de schwäizer Championstitel an dat siwe Spilldeeg virum Enn vun der Saison. Fir de Martins ass et nom Doublé déi lescht Saison den drëtten Titel.

Samscheg

Bei der 4:2-Victoire vu Worskla Poltawa géint Sorja Luhansk war de Mann vum Match op Säite vu Worskla Poltawa de Kulach mat dräi Goler. De Lëtzebuerger Oli Thill hat de Ball an der 79.Minutt onglécklech an den eegene Gol deviéiert, a sou fir den tëschenzäitleche 4:1 aus der Sicht vu senge Faarwe gesuergt. De Lëtzebuerger stoung déi 90 Minutten um Terrain.

Nieft dem Oli Thill war och de Gerson Rodrigues an der Ukrain am Asaz. Bei der 1:0-Victoire vu Kiew géint den Tabellenzweeten aus Donezk gouf de Lëtzebuerger an der 71. Minutt agewiesselt. Kiew bleift domat klore Leader am Championnat mat 10 Punkten Avance op Donezk.

An der 3. däitscher Liga gouf et um Samschdeg fir Saarbrécken eng batter 1:2-Defaite géint Kaiserslautern. Saarbrécken, bei deenen de Maurice Deville net am Kader stoung, steet domat op der 6. Tabelleplaz, Kaiserslautern konnt sech duer d'Victoire op déi 17. Plaz verbesseren.

A Griicheland koum Kreta géint Atromitos zu engem 1:1-Remis. De Lëtzebuerger Nationalspiller Vahid Selimovic souz bei Kreta iwwer 90 Minutten op der Bänk.

Freideg

Am Championnat a Moldawien huet e Freideg den Owend Sheriff Tiraspol eng 10:0-Victoire bei Speranta Nisporeni gefeiert. De Sébastien Thill gouf bei Sheriff an der Paus ausgewiesselt, zu deem Zäitpunkt stoung et scho 5:0. Tiraspol ass weider Leader an der héichster Divisioun a Moldawien.

An der ukrainescher Premier League huet Lviv mam Enes Mahmutovic eng Victoire gefeiert. D'Ekipp huet mat 3:1 géint Olekandrija gewonnen. De Lëtzebuerger stoung déi 90 Minutten iwwer um Terrain. Duerch d'Victoire steet Lviv elo op der 11. Plaz an der Tabell.

Eng weider Victoire gouf et fir Royale Union St. Gilloise. D'Ekipp huet an der zweeter Divisioun am belsche Championnat mat 4:0 zu Bruges gewonnen. Den Anthony Moris souz op der Bänk, dat well d'Ekipp den Opstig scho laang an der Täsch huet.

An der 2. Liga a Portugal huet Vilafranquense mat 0:2 géint Leixoes de Kierzere gezunn. Den Eric Veiga gouf bei der Lokalekipp an der 68. Minutt agewiesselt. Vilafranquense steet an der provisorescher Tabell ee Punkt virun den Ofstigsplazen.