Ouni Problemer huet sech d'Ekipp vum Christian Lutz um Cents beim RM Hamm Benfica mat 4:0 duerchgesat.

D'Matcher vun der BGL Ligue resuméiert vum Gilles Tricca

E Samschdeg war den Optakt vum 10. Spilldag am nationale Futtballchampionnat. An der éischter Partie vum Dag huet sech Stroossen mat 4:0 beim RM Hamm Benfica duerchgesat. Déi Stroossener waren déi 90 Minutten iwwer déi kloer besser Ekipp, hate méi vum Match an hunn an der Defensiv kaum eppes ubrenne gelooss. Fir Stroossen hunn de Perez (15', 50'), de Rouffignac (33') an den Diaf (79') d'Goler geschoss.

Duerch dës Victoire steet Stroossen op d'mannst fir eng Nuecht un der Tabellespëtzt. Hamm bleift dogéint am Tabellekeller.

Ënnert dem neien Trainer David Vandenbroeck konnt sech Wolz beim 1:1 ee Punkt géint de Champion Fola sécheren. Déi Escher waren an der 68. Minutt duerch de Grisez a Féierung gaangen. Nëmme 5 Minutte méi spéit hat de Crnomut fir d'Lokalekipp ausgeglach. Wolz war iwwer wäit Strecken am Match déi besser Ekipp, ma si hunn hir Chancen net richteg genotzt an esou musse si sech mat engem Punkte zefridde ginn.

De Progrès Nidderkuer huet beim 3:2 géint Péiteng misse bis déi lescht Sekonn ëm déi dräi Punkten zidderen. No Goler vu Skenderovic (8') an De Almeida (26', 42') louch d'Lokalekipp an der Paus verdéngt mat 3:0 a Féierung. No Paus huet de Progrès awer komplett de Fuedem verluer an esou ass et Péiteng gelongen, fir duerch Goler vu Pina (51') a Collet (86') op 2:3 ze verkierzen. Um Enn ass de Gäscht awer kee weidere Gol méi gelongen, sou datt déi dräi Punkten zu Nidderkuer bleiwen.

Eng 2:1-Victoire gouf et da fir de Racing géint Munneref. Déi Stater ware besser an de Match komm a ware verdéngt an der 22. Minutt duerch e Gol vum Rossi a Féierung gaangen. D'Ekipp vum Saibene hätt an der Paus nach méi däitlech kënne féieren, hätte seng Spiller net e puer 100%-Chancë leie gelooss. An der 55. Minutt konnt de Racing dunn awer säin Avantage ausbauen. De Mabella huet op 2:0 gesat. D'Lokalekipp huet sech duerno zeréckgezunn an déi Munnerefer hu sech méi gewisen. Esou sollt et an der Schlussphas dann och nach eng Kéier spannend ginn. De Cétout konnt nämlech fir d'Gäscht an der 83. Minutt op 1:2 verkierzen. Um Enn huet de Racing de knappe Virsprong awer iwwert d'Zäit bruecht a ka sech iwwer dräi Punkte freeën.

D'Resultater am Iwwerbléck (Replay an Ticker)

D'Tabell