D'Ekipp vum Dan Santos huet an der Partie zu Ohrid géint d'Nordmazedonierinnen déi éischte Victoire an der Geschicht vun enger WM-Qualifikatioun gefeiert.

D'Lëtzebuerger Futtball-Dammennationalekipp huet en Dënschdeg de Mëtteg hire 4. Match am Grupp D vun der Qualifikatioun fir d'Weltmeeschterschaft 2023 gespillt. Nodeems d'Ekipp vum Dan Santos nach e Freideg géint déi europäesch Spëtzenekipp aus Éisträich mat 0:5 verluer hat, huet elo de Géigner Nordmazedonien geheescht. Um Enn gouf et eng historesch Victoire. D'Lëtzebuergerinnen hu sech duerch d'Goler vum Julie Marques (8', 62') an dem Kate Thill (67') mat 3:2 duerchgesat.

FLF-Damme wanne géint Nordmazedonien / Reportage Franky Hippert

De Match huet perfekt fir d'Rout Léiwinnen ugefaangen. Nämlech mat engem Gol fir d'Geschichtsbicher. D'Gaby De Lemos huet op d'Julie Marques gespillt an d'Spillerin vum Standard vu Léck ass virum Gol äiskal bliwwen. Et war dem Julie Marques säin zweete Gol fir d'Nationalekipp an deen éischte fir Lëtzebuerg an enger WM-Qualifikatiounscampagne.

Den Nationaltrainer Dan Santos hat säin Onze de base par rapport zum Match géint Éisträich op 4 Positioun geännert a méi offensiv spille gelooss. An dat war dee richtege Choix.

Et wollt een Nordmazedonien awer op kee Fall ënnerschätzen. D'Formatioun vum Kiril Izov hat de leschten Donneschdeg mat 4:1 zu Riga géint Lettland gewonnen an huet mam Natasha Andonova e Star am Kader, dee bei Turbine Potsdam, Paris Saint-Germain a Barcelona gespillt huet. Eng weider Spillerin, déi erausstécht, ass d'Gentjana Rochi, déi fréier zu Leverkusen hir Sue verdéngt huet. Dat huet een dann och beim Fräistouss fir den 1:1 gesinn, wou d'Lucie Schlimé keng Chance hat, den 1:1 ze verhënneren. Mat dësem gerechte Remis ass et an d'Paus gaangen.

D'Rout Léiwinnen haten am Ufank vun der zweeter Hallschent eng schwéier Phas z'iwwerstoen. Déi grouss Kampfbereetschaft vun der ganzer Ekipp hunn e Réckstand verhënnert. A virun allem hunn d'Lëtzebuergerinne mental Stäerkt gewisen. An der 62. Minutt war et nees d'Julie Marques, dat d'FLF-Formatioun a Féierung geschoss huet. En herrleche Gol vun der 17 Joer jonker Offensivspillerin. Mee domadder nach net genuch. 5 Minutte méi spéit huet d'Julie Marques den 3:1 fir d'Kate Thill virbereet, dat de Ball onhaltbar an de Gol gekäppt huet.

Déi historesch éischt Victoire war no, mee d'Rout Léiwinnen hu misse zidderen. An der 90. Minutt huet Pavlinka Nikolovska d'Partie nach emol spannend gemaach. D'Dammen aus Nordmazedonien haten dunn nach bal den Ausgläich geschoss. Mee um Enn hunn d'Lëtzebuergerinnen hire Succès verdéngt iwwert Zäit gerett.

Den nächste Match vun der Campagne ass Enn November am Stade de Luxembourg géint Éisträich.

D'Goler vun de Lëtzebuergerinnen am Video

Den 1:0 fir Lëtzebuerg
An der 8. Minutt huet d'Julie Marques de Gol markéiert.
Den 2:1 fir Lëtzebuerg
An der 62. Minutt duerch d'Julie Marques.
Den 3:1 fir Lëtzebuerg
An der 67. Minutt duerch d'Kate Thill.

De Replay vum Match