De Lëtzebuerger war bei der 0:1-Defaite fir Sparta de ganze Match am Asaz. De Laurent Jans ass dogéint op der Bänk bliwwen.

Sonndeg

An der hollännescher Eredivisie gouf et fir Sparta Rotterdam am Match géint den Tabelleleader Ajax näischt ze huelen. Bei der 0:1-Defaite géint d'Ekipp vun Amsterdam stoung de Mica Pinto de ganze Match um Terrain. De Laurent Jans ass ouni Asaz bliwwen.

A Moldawien huet Sheriff Tiraspol de Géigner Dinamo Auto mat 7:0 iwwerrannt. Dobäi konnt de Sébastien Thill de Gol zum tëschenzäitleche 4:0 an der 33. Minutt schéissen.

An der Ligue 1 a Frankräich huet Troyes mat 0:1 bei Olympique Marseille de Kierzere gezunn. De Gerson Rodrigues stoung bei Troyes 90 Minutten um Terrain a krut an der 59. Minutt Giel gewisen.

Och fir d'Young Boys gouf et an der schwäizer Super League eng 0:1-Néierlag. De Christopher Martins stoung géint den FC Zürech an der Starteelef a gouf kuerz viru Schluss ausgewiesselt.

A Griechenland stoung de Vahid Selimovic bei 2:1-Victoire vum OFI Kreta géint Ionikos Nikea net am Kader.

Samschdeg

An der 3. Liga an Däitschland konnt sech Saarbrécken mat 2:0 géint Viktoria Berlin duerchsetzen. De Lëtzebuerger Maurice Deville ass beim Stand vun 0:0 an der 78. Minutt agewiesselt ginn. Kuerz dorop ass den 1:0 fir Saarbrécken gefall. An der 85. Minutt huet de Stiermer dunn mat sengem Gol fir d'Schlussresultat vun 2:0 gesuergt.

An der Ukraine huet Worskla Poltawa eng batter 1:5 Defaite géint Dnipro mussen astiechen. Den Olivier Thill gouf an der 67. Minutt bei Poltawa ausgewiesselt. De Vincent Thill stoung net am Kader.

An der englescher Championship gouf et fir den Danel Sinani mat Huddersfield Town eng 1:2-Néierlag géint Middlesbrough. De Lëtzebuerger Nationalspiller, deen am leschte Match nach getraff huet, stoung 90 Minutten um Terrain.

Den Eric Veiga huet an der 2. Liga a Portugal mat Vilafranquense 0:0-Gläich géint Academico gespillt. Den Eric Veiga stoung 90 Minutten um Terrain a krut an der 86. Minutt déi Giel Kaart vum Arbitter gewisen. Vilafranquense steet an der Tabell op der 15. Plaz.

Um Samschdeg de Mëtteg stoung den Dirk Carlson bei der 1:2-Néierlag vun Erzgebirge Aue géint Darmstadt 90 Minutten um Terrain. De Tim Kips souz iwwerdeems 90. Minutten op der Bänk bei Aue. Aue bleift duerch des Néierlag weider am Tabellekeller, iwwerdeems Darmstadt déi 1. Plaz an der 2. Liga an Däitschland verdeedege kann.

Freideg

An der Bundesliga huet Mainz e Freideg den Owend mat 1:2 zu Stuttgart de Kierzere gezunn. De Leandro Barreiro stoung vun Ufank un um Terrain a gouf an der 75. Minutt ausgewiesselt. Fir Mainz war et no véier ongeschloene Match nees déi éischt Néierlag.

D'Goler fir d'Lokalekipp hunn den Ito (21') an de Sosa geschoss. Fir Mainz hat den Hack an der 38. Minutt ausgelgach.

No laanger Zäit gouf et am belsche Championnat e Freideg nees eng Néierlag fir Royale Union SG mam Anthony Moris. Den Opsteiger an aktuelle Leader huet mat 1:3 géint Oud-Heverlee Leuven verluer.

Besser war den Owend fir Lviv mam Enes Mahmutovic. Mat 1:0 huet ee sech beim Tabelleleschten FK Mariupol duerchgesat. De Lëtzebuerger Nationalspiller stoung de ganze Match um Terrain.

Op Zypern huet sech Achnas mam Tim Hall mat 1:0 géint Ol. Nicosia duerchgesat. Den Tim Hall stoung bei der Lokalekipp 90 Minutten um Terrain. Mat nëmme 5 Punkten no 11 Spilldeeg steet Achnas op der leschter Tabelleplaz.