An der Halleffinall géint d'Titelfavoritinnen aus China gouf et fir d'Lëtzebuergerinne no 3 Sätz keng Chance op e Weiderkommen.

No der staarker Victoire an der Véierelsfinall géint d'Inderinne Manika Batra (WR 56) an Archana Kamath (WR 123) stoung e Sonndeg bei der Dëschtennis-WM zu Houston fir d'Ni Xia Lian an d'Sarah De Nutte d'Halleffinall un.

Do ass et géint d'Yingsha Sun (WR 11) an d'Manyu Wang (WR 3) eng 0:3-Defaite ginn. An den 2 éischte Sätz hu sech d'Lëtzebuergerinne jeeweils misse mat 4:11 an 3:11 geschloe ginn. Am leschte Saz ass et dann nach ee Mol spannend ginn, ma och hei hu si um Enn mat 12:14 de Kierzere gezunn.

Reaktioun vum Ni Xia Lian a Sarah De Nutte
Op der Dëschtennis-WM ass et am Dubbel eng Bronze-Medail fir déi 2 Lëtzebuerger Dammen

Fir d‘Sarah De Nutte war et schwéier, no der Halleffinall ze realiséieren, wat déi leschte Woch alles passéiert ass.

Sarah De Nutte: Déi ganz Woch war Wansinn! Ech hätt ni geduecht, datt mir nach esou laang géife spillen. Mir hunn heiansdo de Geck gemaach, datt mir nach ëmmer dra sinn. Mir hunn e puer Mol Zëmmer mussen ëmbuchen. Et war just geplangt, datt mir bis de 26. sollte bleiwen. Et ass wierklech verréckt.

38 Joer no der éischter Weltmeeschterschaftsmedail huet d‘Ni Xia Lian mat 58 Joer nees eng Kéier eng Medail op enger WM gewonnen.

Ni Xia Lian: Am Ufank wousste mir net, wéi wäit mir kéimen. Mir wollte just fir all Punkt kämpfen, fir all Match ze gewannen. Mir ware voll op eist Spill konzentréiert. Elo hu mir Lëtzebuerger Sportgeschicht geschriwwen. Et ass eng grouss Éier fir eis. Et ass ee schéint Gefill a mir sinn immens frou.

Freed fir de Parcours och bei der Teamkolleegin an hiren Invitéen

Och wann d’Resultat um Enn däitlech war, huet d’Freed iwwert de Parcours vum Lëtzebuerger Dubbel iwwerweit. Op alle Fall bei de ronn 25 Invitéen, déi de Match live bei dem Sarah De Nutte senger Teamkolleegin a Matbewunnerin Dani Konsbrück erlieft hunn. D’Mamm, d’Frënn aus dem Dëschtennis-Milieu hunn d’Koppel Ni/De Nutte ugefeiert bis zum leschte Ball a waren trotz Defaite houfreg!