De Lëtzebuerger Nationalspiller huet mat senger Ekipp d'Conference Finals mat 2:1 géint Philadelphia gewonnen.

An der Finall vun der MLS geet et den nächste Weekend géint Portland.

Am Championnat op Zypern huet Achnas mam Tim Hall 0:1 géint de Leader Apollon verluer. Achnas steet op der leschter Plaz. Den Tim Hall huet duerchgespillt.

Sonndeg

An der Eredivisie, der héchster Spillklass an Holland, huet Sparta Rotterdam zu Alkmaar mat 1:3 de Kierzere gezunn.  Bei de Gäscht vu Rotterdam stoung de Mica Pinto 90 Minutten um Terrain iwwerdeems de Laurent Jans an der 46. Minutt agewiesselt gouf. D'Ekipp vun deenen zwee Lëtzebuerger bleift domat weider am Tabellekeller hänken.

An Éisträich koum et zu Wien zum Derby tëscht Rapid an der Austria. Beim 1:1-Gläich ass de Marvin Martins bei der Austria wéinst enger Verletzung net zum Asaz komm.

Samschdeg

An der Bundesliga ka Mainz mam Leandro Barreiro eng däitlech 3:0-Victoire géint Wolfsburg feieren. De Mëttelfeldspiller huet de ganze Match gespillt. An der 2. Minutt huet hien den éischte Mainzer Gol virbereet an an der 78. déi giel Kaart gesinn.

An der 2. Liga a Portugal huet Vilafranquense mam Eric Veiga e Samschdeg de Mëtten 1:1 géint Feirense gespillt. De Lëtzebuerger stoung 90 Minutte laang um Terrain an huet an der 44. Minutt de Gol vu senger Ekipp virbereet.

An der Ukrain gouf et fir Worskla Poltawa mam Olivier Thill en 0:0 géint Rukh Lviv. De Lëtzebuerger gouf an der 75. Minutt agewiesselt, säi Brudder Vincent Thill stoung net am Kader. Mat dësem Remis bleift Worskla Poltawa op der 5. Tabelleplaz.

A Griicheland huet den OFI Kreta doheem eng 1:3-Néierlag géint Olympiakos Piräus missen astiechen. De Vahid Selimovic ass an der 74. Minutt agewiesselt ginn, konnt d’Defaite awer net méi verhënneren.

An der franséischer Ligue 1 huet Troyes mam Gerson Rodrigues onglécklech mat 1:2 beim aktuelle Champion Lille verluer. De Lëtzebuerger stoung net am Kader.

Fir Huddersfield gouf et iwwerdeems an der 2. englescher Liga en 1:1 bei Barnsley. D’Lokalekipp bleift domat op enger Ofstigsplaz, wärend Huddersfield am Mëttelfeld vun der Tabell läit. Den Danel Sinani stoung net am Kader.

An der Schwäiz gouf et dann nach fir d’Young Boys Bern mam Christopher Martins eng batter 1:2-Heemdefaite géint Servette. De Mëttelfeldspiller huet an der 23. Minutt déi giel Kaart gesinn an ass an der Nospillzäit vun der éischter Hallschent vum Terrain geflunn.

Freideg

Am Championnat an der Belsch huet Royale Union St. Gilloise no enger Néierlag de leschte Spilldag et e Freideg den Owend besser gemaach. Mat 2:1 huet ee sech bei St. Truiden duerchgesat. Bei de Gäscht stoung de Lëtzebuerger Anthony Moris wéi gewinnt tëscht de Pottoen. Den Opsteiger steet weiderhin un der Spëtzt vun der Tabell.

An der 2. Bundesliga an Däitschland ass et net esou gutt fir Aue gelaf. Auswäerts hat ee beim 0:4 géint Bremen keng Chance. Den Dirk Carlson stoung an der Startformatioun.

An der 3. Liga an Däitschland konnt sech Saarbrécken mam Maurice Deville freeën. Zu Zwickau huet ee mat 2:1 gewonnen. De Lëtzebuerger stoung vun Ufank un um Terrain a gouf an der 81. Minutt ausgewiesselt.

An der Ukrain huet Lviv sech laang gutt gehale beim Auswäertsmatch géint Shakhtar Donetsk. Um Enn huet ee sech duerch véier Goler an der Schlussphas awer misse mat 1:6 geschloe ginn. Den Enes Mahmutovic stoung bei der Néierlag géint de Leader an der Startformatioun a krut an der 83. Minutt Rout gewisen.