Donieft wënnt Hoffenheim 3:2 géint Frankfurt a Bielefeld a Köln trenne sech mat 1:1.

Mainz mam Leandro Barreiro huet Wolfsburg keng Chance gelooss a verdéngt mat 3:0 gewonnen. No 4 Minutte louch d’Ekipp vum Bo Svensson schonn duerch Goler vum Jonathan Burkardt a vum Anton Stach a Féierung, wat déi séierst 2:0-Féierung an der Bundesliga-Geschicht vu Mainz ass. Wolfsburg war an der Offensiv ze harmlos an hat am ganze Match kee Schoss op de Gol. De Leandro Barreiro huet de ganze Match gespillt, den éischte Gol vu senger Ekipp virbereet an an der 78. Minutt déi giel Kaart gesinn.

Arminia Bielefeld huet géint den 1. FC Köln beim 1:1 op en Neits eng uerdentlech Leeschtung gewisen, konnt sech awer nees net mat enger Victoire belounen. Nom Gol vum Salih Özcan an der 17. Minutt ass et mat engem 0:1 fir d’Gäscht an d’Kabinne gaangen, ongeféier eng Véierelsstonn no der Paus konnt de Bryan Lasme awer ausgläichen. Bielefeld bleift domat op der 17. Plaz, wärend Köln weiderhin op Plaz 9 läit.

Hoffenheim kënnt ëmmer besser a Form an huet och géint Eintracht Frankfurt beim 3:2 eng iwwerzeegend Leeschtung gewisen. Nodeems de Rafael Santos Borré seng Ekipp nach a Féierung konnt bréngen, huet Hoffenheim de Match duerch Goler vu Geiger a Rütter nach an den éischte 45 Minutte gedréint. D’Lokalekipp ass och no der Paus iwwerleeë bliwwen a konnt duerch de Samassekou op 3:1 erhéijen. An der 72. Minutt konnt den agewiesselten Paciencia dunn nees verkierzen, fir méi ass et awer net méi duergaangen.

Bayer Leverkusen huet doheem Greuter Fürth keng Chance gelooss a louch scho fréi duerch Goler vun Adli (11’) an Tapsoba (17’) mat 2:0 a Féierung. An der 33. Minutt konnt Fürth duerch den Dudziak zwar nach verkierzen, d’"Werkself" konnt awer direkt virun an no der Paus mat zwee weidere Goler den Deckel dropmaachen. Fürth huet du kaum méi Géigewier geleescht, soudass de Match mat 7:1 op en Enn gaangen ass. Bei Leverkusen huet mat 4 Goler a 27 Minutte virun allem de Patrik Schick erausgestach. Wärend d’Lokalekipp domat den 3. an der Tabell bleift, ass Fürth weiderhin ofgeschloen op der leschter Plaz.

Zu Augsburg konnt de VfL Bochum eng iwwerraschend 2:3-Victoire feieren. An der Hallschent stoung et no zwee Goler vum Sebastian Polter an engem vum Gerrit Holtmann schonn 3:0 aus der Siicht vun de Gäscht, Augsburg huet donieft zwee Mol verletzungsbedéngt misse wiesselen. D’Ekipp vum Markus Weinzierl ass no der Paus zwar duerch Goler vu Gregoritsch a Caligiuri nach eemol staark zréckkomm, um Enn konnt Bochum d’Victoire awer iwwer d’Zäit retten an déi gutt Form confirméieren. Den Opsteiger ass elo den 10. an Augsburg läit weider op der Relegatiounsplaz.

Um 18.30 Auer koum et dunn nach zum "Klassiker" tëscht Borussia Dortmund a Bayern München. Eng ganz spannend an attraktiv Partie ass schlussendlech mat 2:3 op en Enn gaangen. An engem temporäiche Match war et fir d’éischt de BVB, deen a Persoun vum Julian Brandt schonn no 5 Spillminutten a Féierung konnt goen. D’Bayern waren dovun awer net beandrockt an de Lewandowski huet an der 9. Minutt direkt ausgeglach. Doropshin huet sech een intensive Match entwéckelt, deen awer net vill Golchancen ze bidden hat. Trotzdeem waren et d’Gäscht, déi méi vum Spill haten a kuerz virun der Paus och duerch de Coman de Match gedréint hunn. An der 48. Minutt war et dann awer nees de BVB, deen duerch ee schéinen Ofschloss vum Haaland rëm konnt zréckkommen. Et ass weider hin an hir gaangen, wat virun allem doru louch, dass béid Ekippe Problemer an der Defense haten. An der 76. Spillminutt gouf et dunn déi entscheedend Zeen, wéi den Hummels bei engem Münchener Corner mat der Hand um Ball war. De Schiedsrichter Felix Zwayer huet no Agrëff vum VAR op Eelefmeter entscheet, wat de Lewandowski sech net huele gelooss huet. D’Ekipp vum Julian Nagelsmann huet d’Féierung dunn iwwer d’Zäit bruecht a sech domat och an der Tabell 4 Punkten vum BVB ofgesat, dee weiderhin 2. ass.

D'Statistike vun de Matcher

Klickt hei, fir op d'Säit mat all de Resultater ze kommen.

D'Klickt op de Match, fir d'Statistiken ze gesinn.

D'Tabell vun der Bundesliga