Mat 0:4 musse sech iwwerdeems Köln géint Bayern geschloe ginn. Mainz wënnt mam Leandro Barreiro géint Bochum. Victoirë ginn et och fir Leipzig an Union.

Am Owesmatch tëscht Gladbach an Leverkusen ass et no enger méi roueger 1. Hallschent mat 0:0 an d'Kabinne gaangen. Nom Säitewiessel ass et du méi intensiv ginn. Leverkusen huet an deenen zweete 45. Minutten zwee Eelefmeter krut, alle béid huet de Sommer am Gladbacher Gol gehalen. Leverkusen huet sech doduerch awer net aus der Rou brénge gelooss a konnt duerch den Andrich an de Schick de Sommer dann awer nach zwee Mol iwwerwannen. Dem Elvedi säin Uschlossgol ass ze spéit gefall, sou dass Gladbach doheem mat 1:2 géint Leverkusen de Kierzeren zitt.

De Branchenprimus Bayern München huet eng verdéngte Victoire zu Köln gefeiert. Nom Gol vum Lewandowski huet de Tolisso mam 2:0 nach virun der Paus fir kloer Verhältnisser gesuergt. Köln huet wuel den Uschloss markéiert, gouf awer wéinst Abseits vum VAR nees annuléiert. De Lewandowski huet mat senge Goler 22 an 23 an dëser Saison fir 4:0 d'Schlussresultat gesuergt. Domat bleift Bayern an der Tabell 6 Punkte virum BVB.

Mainz huet sech mam Leandro Barreiro e wichtegen Dräier géint Bochum gekroopt. Géint de staarken Opsteiger aus dem Ruhrpott huet de St. Juste direkt um Ufank vun der 2. Hallschent de goldege Gol geschoss. Mainz gewënnt domat mat 1:0 géint Bochum a steet an der Tabell elo 4 Punkte virum VFL.

Leipzig ass mam Trainer Domenico Tedesco weider um Virmarsch. Zu Stuttgart hunn déi rout Bulle sech no Goler vum Silva an Nkuknku mat 2:0 konnten duerchsetzen. Eng Victoire gouf et och fir Union Berlin. D'Körpenicker louche wuel mat 0:1 géint Hoffenheim a Réckstand, hunn de Match awer duerch Goler vum Voglsammer a Promel zu hire Gonschte gedréint an entscheeden de Match um Enn mat 2:1 fir sech.

Een 0:0-Remis ass et tëscht Wolfsburg an Hertha ginn, wat kengem vu béiden Ekippe weider hëlleft.

D'Statistike vun de Matcher

Klickt hei, fir op d'Säit mat all de Resultater ze kommen.

D'Klickt op de Match, fir d'Statistiken ze gesinn.

D'Tabell vun der Bundesliga